Orijinal məzmunun sonu: Süni intellekt dəstəkli avtonom saytlar gəlir

Yeni bir startap insan müdaxiləsinə ehtiyac olmadan məzmun yaradan, özünü optimallaşdıra bilən və daimi yenilənən veb-saytlarla rəqəmsal dünyanın dinamikasını kökündən dəyişməyə hazırlaşır.

Valyuta.az xəbər verir ki, yeni yaranmış "Flint" adlı şirkət, tamamilə muxtar veb-saytlar qurmağı hədəfləyən iddialı planı ilə gündəmdədir. "Flint” insan müdaxiləsi olmadan öz səhifələrini “yarada” və “özünü optimallaşdıra” bilən saytlar hazırlamağı qarşısına məqsəd qoyub.

Şirkətin platforması artıq “Cognition”, “Modal” və “Graphite” kimi firmalar üçün aktiv səhifələri idarə edir. Sistem müqayisə səhifələri, reklam açılış səhifələri və süni intellekt tərəfindən yaradılan SEO məzmunları hazırlayır.

İstifadəçilərin etməli olduğu yeganə şey məzmunun qısa təsvirini yükləmək və mövcud saytlarının bağlantısını paylaşmaqdır. “Flint” markanın dizayn sistemini analiz edərək, avtomatik şəkildə kodlaşdırılmış səhifələri birbaşa domenə yerləşdirir.

“Flint”in həmtəsisçisi və baş direktoru Mişel Lim bildirib: "Artıq ənənəvi veb-saytların dövrü başa çatıb. Statik varlıqlar olmaqdan çıxır, muxtar rəqəmsal agentlərə çevrilirik. Veb-saytınız ya muxtardır, ya da köhnəlib".

Şirkətin ilkin məlumatları, güclü SEO nəticələri və daha sürətli reklam dönüşləri göstərir, lakin bu rəqəmlər hələlik yalnız “Flint”in daxili hesabatları ilə məhdudlaşır. Şirkət “Accel”in rəhbərliyində, Şeril Sandberqin investisiya fondu və “Neo”nun iştirakı ilə 5 milyon dollarlıq ilkin sərmayə cəlb edib. Bu vəsaitlər tətbiqi süni intellekt və dizayn mühəndisliyi sahələrində genişlənməyə yönəldiləcək. “Flint” gizli inkişaf mərhələsini başa vuraraq beta proqramı üçün gözləmə siyahısını açıb.

İnvestorlar “Flint”i marketinq və onlayn axtarış proseslərində süni intellekt yönümlü çevrilməyə uyğunlaşmağı hədəfləyən yeni rəqəmsal infrastruktur dalğasının bir hissəsi kimi görürlər. Bu süni intellekt və veb-dizayn sintezi, ənənəvi pulsuz sayt yaradıcılarının və süni intellekt əsaslı sayt alətlərinin statik şablonlardan çıxaraq, daim özünü yeniləyə bilən sistemlərə çevrilməsinin yolunu aça bilər.

“Bernthal Venture Partners”ın həmtəsisçisi Şeril Sandberq qeyd edib: "Süni intellekt vebi köklü şəkildə dəyişir. Şirkətlər veb-saytlarını effektiv marketinq və müştəri cəlbi kanalı kimi qorumaq istəyirlərsə, sürətlə uyğunlaşmalıdırlar. "Flint" bu dəyişimi mümkün edən yeni nəsil rəqəmsal infrastrukturu qurur; axtarış imkanı və onlayn reklamçılığı süni intellekt dövrünün tələblərinə uyğunlaşdırır".

Bununla belə, uzunmüddətli perspektivdə özünü dəyişdirən veb-saytların “Google” kimi axtarış sistemləri ilə necə qarşılıqlı əlaqədə olacağı hələlik bəlli deyil. “Flint”in vizyonu iddialıdır: rəqiblərin fəaliyyətini müəyyən edən, ziyarətçilərin profilinə uyğun səhifə tərtibatını dəyişən və hətta birbaşa süni intellekt agentləri ilə əlaqə qura bilən veb-saytlar.

“Accel”in ortağı Den Levin qeyd edir: "Marketoloqlar köhnə alətlərlə məhdudlaşıb. ‘Flint’ onlara nəhayət rəqabət aparmaq üçün süni intellekt gücü qazandırır".

Lakin tam muxtar veb-sistemlər nəzarət, şəffaflıq və optimallaşma standartlarına uyğunluq kimi yeni müzakirələri də gündəmə gətirir. Əgər bu konsepsiya uğurlu olarsa, ənənəvi pulsuz veb-sayt yaradıcılarının və süni intellekt əsaslı alətlərin iş prinsipini köklü şəkildə dəyişdirə bilər.

Hazırda “Flint”in ideyası, veb-dizaynda avtomatlaşdırmanın roluna dair böyüyən müzakirəyə yeni bir halqa əlavə edir: veb özünü yeniləməyə başladıqda, hələ də proqnozlaşdırıla bilən bir mühit ola biləcəkmi?

Paşa Məmmədli