Süni intellekt startapı 100 milyon avro investisiya aldı

"NestAI" startapının 100 milyon avroluq sərmayə raunduna "Nokia" və Finlandiyanın dövlət dəstəyi ilə fəaliyyət göstərən investisiya şirkəti "Tesi" birgə rəhbərlik edib.

Valyuta.az xəbər verir ki, Finlandiyada yerləşən "NestAI", əldə etdiyi bu yeni maliyyəni fiziki süni intellekt laboratoriyası yaratmaq və müdafiə sahəsində avtonom nəqliyyat vasitələri ilə komanda-idarəetmə sistemləri inkişaf etdirmək üçün istifadə edəcəyini bildirib.

Şirkət 2025-ci ildə Piter Sarlin tərəfindən təsis edilib. "NestAI" süni intellekti fiziki dünyaya inteqrasiya edən fiziki süni intellekt sahəsində fəaliyyət göstərir. Şirkət xüsusilə müdafiə sektoruna fokuslanaraq pilotsuz uçuş aparatları, avtonom quru nəqliyyat vasitələri və komanda-idarəetmə platformaları üçün qabaqcıl süni intellekt həlləri hazırlayır. Bu yanaşma sayəsində pilotsuz vasitələrin müstəqil tapşırıqları yerinə yetirə bilməsi, ətraf mühiti dərk edərək sürətli və düzgün qərarlar verməsi hədəflənir.

"NestAI" böyük dil modelləri ilə robot texnologiyalarını birləşdirərək real dünya tətbiqlərində istifadə oluna bilən süni intellekt sistemləri yaradır. Bununla yanaşı, "Nokia" kimi böyük texnologiya şirkətləri ilə əməkdaşlıq quraraq proqram təminatı və avadanlıq sahəsində güclü bir ekosistem formalaşdırır və Avropanın müdafiə texnologiyalarında müstəqilliyini artırmağı qarşısına məqsəd qoyur.

Şirkət Avropanın aparıcı fiziki süni intellekt laboratoriyalarından birinə çevrilməyi və uzunmüddətli geosiyasi risklərə qarşı yerli həllər hazırlamağı hədəfləyir.

Mayya Hüseynova