"Süni intellekt startap qurmağın xərcini kəskin azaldıb"

Süni intellekt və rəqəmsal alətlərin sürətli inkişafı startap qurmaq üçün tələb olunan maliyyə və resursları əhəmiyyətli dərəcədə azaldıb. 

Valyuta.az xəbər verir ki, mütəxəssislərə görə, bu dəyişiklik erkən mərhələdə biznes quran sahibkarların daha az vəsaitlə daha böyük nəticələr əldə etməsinə imkan yaradır.

Bu barədə Angel Investment Network (AIN) platformasının təsisçisi Mayk Lebus yazdığı məqalədə bildirib.

Onun sözlərinə görə, əvvəllər elektron ticarət saytının qurulması, ödəniş sistemlərinin inteqrasiyası və logistika üçün çox vəsait tələb olunurdusa, bu gün logistika xidmətləri və digər rəqəmsal platformalar sayəsində bu proses çox aşağı xərclə həyata keçirilə bilir.

Lebus qeyd edir ki, artıq mobil tətbiqin ilkin versiyasını hazırlamaq üçün böyük proqramçı komandalarına ehtiyac qalmayıb. No-code platformaları və süni intellekt əsaslı həllər bu prosesi xeyli sadələşdirib. Brend dizaynı, marketinq kampaniyaları və investor təqdimatları da əvvəlkindən daha az xərc və vaxt tələb edir.

Məqalədə vurğulanır ki, süni intellekt müştəri dəstəyi, mətn yazılması, məlumatların təhlili, planlaşdırma, proqramlaşdırma və mühasibatlıq kimi bir çox işi avtomatlaşdırdığı üçün kiçik komandalar əvvəllər böyük kollektivlərin gördüyü işi görə bilir.

M.Lebusun fikrincə, bu gün investorlar üçün məhsuldan daha çox onu quran şəxs ön plana çıxır.

O qeyd edib ki, süni intellekt alətləri artıq hamı üçün əlçatan olduğundan, əsas üstünlüyü bazarı dərindən anlayan, düzgün qərarlar verən və innovativ düşünən sahibkarlar qazanır.

Sərvanə Rəmixanova

Seminar: "İnvestorlar hansı startaplara pul yatırmaq istəyir?"
"Traction Fund" Vençur Fondunun (ABŞ) təsisçisi və investisiya direktoru Ülvi Rəşidin Bakıdakı seminarına qoşulmaq istəyirsiniz? Əlavə məlumat üçün BURA BAXIN.