"Samsung" aparıcı televizor istehsalçısı statusunu itirdi: Yerini hansı şirkət tutdu?

"Samsung" 20 ildən artıq müddətdən sonra ilk dəfə olaraq qlobal televiziya bazarında lider mövqeyini itirərək bu statusu TCL-ə güzəştə gedib. 

Qaynarinfo xəbər verir ki, bu barədə "SamMobile" nəşri "Counterpoint Research" analitiklərinin məlumatlarına istinadən yazıb.

2025-ci ilin dekabr ayının nəticələrinə əsasən, TCL dünya üzrə televiziya tədarükündə 16 faiz payla birinci yeri tutub. "Samsung" isə 13 faiz bazar payı ilə ikinci olub. Növbəti pillələrdə müvafiq olaraq 12, 8 və 5 faiz payla "Hisense", LG və "Walmart" qərarlaşıb.

2026-cı ilin yekun nəticələrinin necə olacağı hələ məlum deyil. Belə ki, rüblük və illik tədarük göstəricilərinə görə "Samsung" hələ də lider olaraq qalır. Lakin dekabr ayının təcrübəsi göstərir ki, TCL ilə rəqabət daha da kəskinləşib. Analitiklərin sözlərinə görə, TCL artıq bir neçə aydır artım tempini yüksəldir, "Samsung"un göstəriciləri isə demək olar ki, dəyişməz qalır.

"Counterpoint Research"in hesabatında bildirilir ki, TCL-in uğuru ilk növbədə Çin xaricindəki bazarlara aqressiv ekspansiyası və model sırasını fəal şəkildə genişləndirməsi ilə bağlıdır. Şirkət həm daha əlverişli qiymətli modelləri, həm də premium seqmentli televizorları aktiv şəkildə irəlilədib.

Bundan əlavə, son illərdə "Samsung" və LG LCD televizorlardan daha bahalı OLED modellərinə yönəlib. Bu isə LCD seqmentində boşluq yaradıb və həmin boşluğu Çin brendləri sürətlə doldurmağa başlayıb. LCD televizorlar OLED modellərlə müqayisədə daha ucuz olduğuna görə daha böyük həcmdə satılır. Bu amil "TCL" kimi brendlərə tədarük həcmlərini artırmağa kömək edir.

Paşa Məmmədli