Çinlilər "Bitcoin"i gizli şəkildə alır?

ABŞ Qiymətli Kağızlar və Birja Komissiyasına (SEC) təqdim olunan 2025-ci ilin IV rübü üzrə 13F hesabatlarında kripto yatırımları ilə bağlı diqqətçəkən məlumat ortaya çıxıb.

Valyuta.az xəbər verir ki, "Bitwise" şirkətinin məsləhətçisi Jeff Park Honq-Konq mərkəzli "Laurore Ltd." adlı şirkətin böyük həcmdə "Bitcoin" ETF-i saxladığını bildirib.

Məlumata görə, şirkətin portfelində yalnız "BlackRock"un "IBIT Bitcoin" ETF-i yer alır və bu investisiyanın dəyəri təxminən 436 milyon dollar təşkil edir. Şirkət haqqında açıq mənbələrdə demək olar ki, heç bir məlumatın olmaması isə suallar doğurur.

Park hesab edir ki, Çində kriptovalyutalara qoyulan məhdudiyyətlər səbəbindən investorlar birbaşa "Bitcoin" almaq əvəzinə, ETF-lər vasitəsilə dolayı şəkildə bazara daxil olmağa çalışa bilərlər. Bu isə Çin kapitalının kripto aktivlərə yönəlməsinin ilk siqnallarından biri kimi qiymətləndirilir.

Sərvanə Rəmixanova