“Reprai” 1 milyon dollar investisiya alıb

Dərman sənayesinə fokuslanan "reprai" “Simya VC” və “Arya VC”nin iştirakı ilə keçirilən investisiya raundu çərçivəsində ümumilikdə 1 milyon dollar vəsait cəlb edib.

Valyuta.az xəbər verir ki, şirkət ötən ilin sentyabr ayında "Simya VC"dən 500 min dollar investisiya aldığını daha əvvəl açıqlamışdı.

ABŞ mərkəzli şirkətin verdiyi məlumata görə, sözügedən raunda "Arya VC"nin də iştirakı ilə birlikdə 1 milyon dollar həcmə çatıb.

“reprai” yeni cəlb olunan investisiyanı ABŞ və Avropa bazarlarında genişlənmək, bazar payını artırmaq və süni intellekt əsaslı texnologiyasını daha da təkmilləşdirmək məqsədilə istifadə edəcəyini bildirib.

Şirkət 2024-cü ildə Didəm Aral və Özhan Öztürk tərəfindən təsis edilib. “reprai” dərman şirkətlərinin marketinq və satış əməliyyatlarını süni intellekt dəstəkli həllərlə transformasiya edir. Platforma dərman istehsalçılarının həkimlər və digər səhiyyə mütəxəssisləri ilə əlaqələrini məlumat əsaslı və fərdiləşdirilmiş formata keçirərək düzgün mesajın düzgün zamanda və düzgün kanal vasitəsilə çatdırılmasını təmin edir.

Süni intellekt əsaslı modellər vasitəsilə marketinq kanallarını optimallaşdıran “reprai” kampaniyaların effektivliyini və investisiyanın geri dönüşünü artırmağı hədəfləyir. Bununla yanaşı, şirkət tənzimləmələrə uyğun və ölçülə bilən rəqəmsal marketinq infrastrukturu təqdim edir.

Didəm Aral bildirib ki, “reprai” yarandığı ilk gündən etibarən strateji bazarlarda miqyaslana bilən böyüməyə və sektorda yeni standartların formalaşdırılmasına fokuslanıb. Onun sözlərinə görə, cəlb olunan investisiyalar bu hədəflərə daha sürətlə çatmağa imkan verəcək. Aral həmçinin investisiya prosesində gender balansına həssas yanaşmanın və qadın liderlərin aktiv rol almasının onlar üçün xüsusi əhəmiyyət daşıdığını vurğulayıb.

Mayya Hüseynova