"Nike" Çin istehsalından asılılığı azaltmağı planlaşdırır

ABŞ-ın idman geyimləri brendi “Nike” Çindəki istehsaldan asılılığı azaltmaq niyyətindədir. 

Valyuta.az xəbər verir ki, şirkət bu addımı ABŞ Prezidenti Donald Trampın rüsum siyasətinin mümkün maliyyə təsirlərini yumşaltmaq məqsədilə atır. “Nike” bildirib ki, yeni rüsumlar bu il şirkətə təxminən 1 milyard dollara başa gələ bilər.

Hazırda ABŞ bazarı üçün nəzərdə tutulan “Nike” ayaqqabılarının 16%-i Çində istehsal olunur.

Şirkətin maliyyə direktoru Metyu Frendin sözlərinə görə, bu göstərici 2026-cı ilin may ayına qədər "yüksək birrəqəmli faizlərə" qədər azaldılacaq. İstehsalın bir hissəsi Çindən digər ölkələrə köçürüləcək. Trampın aprel ayında elan etdiyi “Azadlıq Günü” tarifləri Vyetnamdan gətirilən mallara 46%, İndoneziyadan isə 32% tarif nəzərdə tuturdu – bu ölkələr “Nike”in əsas istehsal mərkəzlərindəndir.

Tariflər sonradan müvəqqəti olaraq 10%-ə endirilib və Ağ Ev 90 günlük danışıqlar müddəti başladıb. Bu müddət 9 iyulda başa çatır və hazırda administrasiya yeni razılaşmalar üzərində işləyir. Tramp bəyan edib ki, bəzi ölkələrlə razılıq əldə olunacaq, digərlərinə isə “sadəcə məktub göndəriləcək və 25–45% tarif tətbiq olunacaq”.

Ötən ay “Nike” bəzi ayaqqabı və geyim məhsullarının qiymətini ABŞ-da artıracağını açıqlayıb. Rəqib “Adidas” da bənzər səbəblərlə qiymət artımı planlaşdırır. Bütün bu qeyri-müəyyənliklərə baxmayaraq, “Nike”in son rüblük gəliri 11,1 milyard dollar olub. Bu, son üç ilin ən zəif göstəricisi olsa da, analitik proqnozlarını üstələyib və nəticədə şirkətin səhmləri birjada 10%-dən çox bahalaşıb.

Sərvanə Rəmixanova