Ağıllı saat satışları artır: "Samsung" üçün təhlükə siqnalı...

Ağıllı saatlar artıq bir çox istifadəçi üçün gündəlik həyatın ayrılmaz hissəsinə çevrilsə də, sektorun aparıcı şirkətlərindən biri olan "Samsung" bu artan populyarlıqdan gözlədiyi qədər faydalana bilmir. Bazar ümumilikdə genişləndiyi halda, Cənubi Koreya istehsalçısının satış göstəriciləri narahatlıq doğurur.

Valyuta.az xəbər verir ki, "Counterpoint Research" tərəfindən açıqlanan son məlumatlara görə, "Samsung"un 2026-cı ilin birinci rübündə ağıllı saat tədarükü illik müqayisədə 28 faiz azalıb. Eyni dövrdə əsas rəqiblərindən olan "Apple"ın 21 faiz artım qeydə alması bu geriləməni daha da diqqətçəkən edir.

Bununla yanaşı, ağıllı saat bazarı ümumilikdə böyüməsini qoruyub saxlayır. Mütəxəssislərin fikrincə, xüsusilə Çin bazarında artan tələbat və sağlamlıq göstəricilərinin izlənməsi üzrə inkişaf etmiş funksiyalar sektorun inkişafına təkan verir. Proqnozlara əsasən, bazarın 2030-cu ilə qədər hər il orta hesabla 3 faiz böyüməsi gözlənilir. Lakin bu müsbət mənzərəyə baxmayaraq, "Samsung"un strateji səhvləri şirkətin rəqabətdə geri qalmasına səbəb olub.

Şirkətin bazar payı itirməsində "Huawei" və "Xiaomi" kimi istehsalçıların aqressiv qiymət siyasəti mühüm rol oynayır. Xüsusilə Hindistan kimi böyük istehlak bazarlarında alıcılar "Samsung"un premium seqment məhsulları əvəzinə daha əlçatan və funksional alternativlərə üstünlük verirlər. Bundan əlavə, "Noise" kimi yerli markaların yüksəlişi də bazardakı rəqabəti daha da gücləndirib.

"Samsung"un qarşılaşdığı digər problem məhsul xəttində yeniliklərin kifayət qədər olmamasıdır. "Galaxy Watch" seriyası uzun müddətdir dizayn və texniki imkanlar baxımından istifadəçilərdə ciddi maraq yaradan dəyişikliklər təqdim etməyib.

Xüsusilə "Galaxy Watch Ultra" modelində köhnə nəsil "Exynos W1000" prosessorunun istifadə olunması şirkətin sadiq müştərilərinin belə yeni modelə keçidini ləngidib.

Hazırda "Samsung" bir tərəfdən büdcəyə uyğun məhsullar təklif edən rəqiblərin təzyiqi, digər tərəfdən isə premium seqmentdə istifadəçiləri cəlb edəcək yeniliklərin çatışmazlığı ilə üz-üzə qalıb.

Paşa Məmmədli