"Binance"in MiCA lisenziya müraciəti rədd edilib

Dünyanın ən böyük kriptovalyuta birjalarından biri olan "Binance"ın Avropa İttifaqının "Kripto Aktivlər Bazarları Tənzimləməsi" (MiCA) çərçivəsində Yunanıstanda etdiyi lisenziya müraciəti rədd edilib.

Valyuta.az xəbər verir ki, şirkət məsələ ilə bağlı açıqlamasında müraciətin rədd edildiyini birbaşa təsdiqləməsə də, **yeni lisenziya müraciəti təqdim edəcəyini** bildirib.

Binance-in MiCA qaydalarına uyğun şəkildə Avropa bazarında fəaliyyətini davam etdirməsi üçün **1 iyul** tarixinədək vaxtı var. Bu müddət ərzində şirkət yeni müraciət etməyi planlaşdırır. Binance nümayəndəsi şirkətin Avropa bazarında fəaliyyətini davam etdirmək niyyətində olduğunu da vurğulayıb.

Məlumata görə, **Yunanıstan, İrlandiya və Latviya** tənzimləyici qurumları Binance-ə lisenziya verilməsi ilə bağlı narahatlıqlarını ifadə ediblər. Bildirilir ki, əsas narahatlıqlar şirkətin keçmişdə üzləşdiyi tənzimləmə problemləri, korporativ idarəetmə strukturu və risk profili ilə əlaqədardır.

Qeyd edək ki, ötən həftə **Reuters** agentliyi Yunanıstanın maliyyə tənzimləyicisinin Binance-in MiCA lisenziyası müraciətini təsdiqləməyəcəyini yazmışdı. Son qərar həmin iddiaları təsdiqləmiş oldu.

Sırvanə Rəmixanova