Qazaxıstandan olan "Armeta" startapı ABŞ-ın aparıcı akseleratorlarından birinə daxil olub

Qazaxıstanın tikinti sənayesi üçün süni intellekt platforması hazırlayan "Armeta" startapı dünyanın ən nüfuzlu akselerator proqramlarından biri olan "Alchemist Accelerator"a qəbul olunub. 

Valyuta.Az-ın verdiyi xəbərə görə, şirkətin təsisçiləri Temirlan Raxmetjanov, Səncar Raxmetjanov və Nuralı Baqtıqaliyevdir. Startap tikinti layihələrinin ekspert qiymətləndirilməsi və razılaşdırılması proseslərini avtomatlaşdıran süni intellekt platforması hazırlayır.

Layihənin ideyası tikinti sektorunun hələ də ən konservativ və zəif rəqəmsallaşdırılmış sahələrdən biri olması ilə bağlı yaranıb. Bu sahədə bir çox proseslər bu gün də əl ilə həyata keçirilir.

Hazırda "Armeta" komandasına 26 mütəxəssis daxildir və şirkətin əsas fəaliyyəti Astana şəhərində yerləşir. Şirkət artıq ABŞ, Qazaxıstan və Qətər daxil olmaqla üç ölkədə fəaliyyət göstərir. Bundan əlavə, startap Azərbaycan, Səudiyyə Ərəbistanı, Birləşmiş Ərəb Əmirlikləri və Özbəkistan bazarlarına çıxmağı planlaşdırır.

Yaxın illərdə startap öz platformasını neft və qaz, energetika, infrastruktur, dağ-mədən və metallurgiya kimi sahələrdə fəaliyyət göstərən dövlət qurumları və iri korporasiyalara təqdim etməyi planlaşdırır.

Rəna Həsənova