"Məqsədsiz pul yığmaq bəzən daxili qorxuların nəticəsi olur"

Bir çox insan pul yığarkən konkret məqsəd qoyur - ev almaq, investisiya etmək və ya böyük xərclərə hazırlaşmaq. Lakin bəziləri də heç bir plan olmadan, sadəcə “hələlik yığım, sonrasına baxaram” düşüncəsi ilə pul toplayır. Bəs, məqsədsiz şəkildə pul yığmaq nə dərəcədə doğru maliyyə davranışıdır? Pul toplayarkən konkret məqsədin olması vacibdirmi?

Klinik psixoloq, psixoterapevt Rövşən Nəcəfov Valyuta.az-a bildirdi ki, pul yığmaq bəzən yalnız maddi məsələ olmur, insanın daxili vəziyyətini də göstərir: “Bəzi insanlar pulu konkret plan üçün deyil, təhlükəsizlik hissi üçün toplayırlar. Sabahın necə olacağını bilməmək, keçmişdə yaşanan çətinliklər, itirmək qorxusu və güvənsizlik hissi bu ehtiyacı gücləndirə bilər. Bu baxımdan, məqsədsiz görünən yığım əslində insanın özünü qoruma cəhdi də ola bilər. Amma əgər pul insana rahatlıq vermək əvəzinə onu daha da narahat edirsə, hər şeyi pulla ölçməyə məcbur edirsə və daxilində bitməyən bir ehtiras yaradırsa, onda bu artıq sadə yığım deyil, psixoloji bağlılıqdır”.

Ekspert bildirir ki, konkret məqsədlə pul yığmaq daha sağlam yanaşmadır: “Bu yanaşma insana istiqamət, nizam və məna verir. Məqsədsiz yığım isə yalnız ehtiyat üçün, gözlənilməz vəziyyətlərə qarşı özünü güvəndə saxlamaq üçün edilirsə, bu da normaldır. Problem pul yığmaqda deyil, pulun insanın düşüncəsinə və xarakterinə hakim olmasındadır. İnsan pulu idarə edəndə bu, faydalı vasitəyə çevrilir. Pul insanı idarə edəndə isə daxildəki qorxuları, acgözlüyü və natamamlıq hissini böyüdür. Sağlam münasibət də elə budur ki, pul həyatın məqsədi yox, sadəcə aləti olaraq qalsın”.

Sərvanə Rəmixanova