Bakıda pərakəndə ticarət dövriyyəsi 3 milyard manatı keçib

2026-cı ilin yanvar ayında Bakıda pərakəndə ticarət dövriyyəsinin həcmi 3 milyard 221,4 milyon manat təşkil edib.

Valyuta.az xəbər verir ki, bu göstərici ötən ilin eyni dövrü ilə müqayisədə 4,3% artım deməkdir.

Ticarət şəbəkəsində satılmış ərzaq məhsulları, içkilər və tütün məmulatlarının dəyəri 2025-ci ilin yanvar ayı ilə müqayisədə 5,6% artaraq 1 milyard 781,8 milyon manata çatıb. Qeyri-ərzaq mallarının satış həcmi isə 2,8% artaraq 1 milyard 439,6 milyon manat olub.

2025-ci ilin yanvar ayı ilə müqayisədə 2026-cı ilin yanvar ayında müəssisələr üzrə pərakəndə ticarət dövriyyəsi 0,6% azalıb. Eyni zamanda, fərdi sahibkarlar, bazar və yarmarkalar üzrə satışlar 7,0% artıb.

İstehlak məhsullarının satış strukturunda əsas pay fərdi sahibkarlara məxsus ticarət obyektlərinin payına düşüb. Belə ki, satılan məhsulların 58,0%-i fərdi sahibkarların ticarət obyektlərində reallaşdırılıb.

Bununla yanaşı, istehlak məhsullarının 33,6%-i hüquqi şəxs statuslu müəssisələrdə, 8,4%-i isə paytaxtın əmtəə bazarlarında satılıb.