ChatGPT-nin "yetkin rejimi"ndə qeyri-müəyyənlik davam edir

Süni intellekt texnologiyalarının insan həyatındakı rolu artdıqca istifadəçilərin bu sistemlərdən gözləntiləri də genişlənir. Rəqəmsal mühitdə istifadəçilərə daha çox seçim və fərdiləşdirmə imkanı verməsi nəzərdə tutulan ChatGPTnin “yetkin rejimi” funksiyası isə gözləniləndən daha gec təqdim olunacaq.

Valyuta.az xəbər verir ki, 2026-cı ilin ilk aylarında istifadəyə verilməsi planlaşdırılan bu xüsusiyyət təsdiqlənmiş istifadəçilərə daha sərbəst və fərdiləşdirilmiş istifadə imkanı yaratmalı idi. Lakin son məlumatlara görə, “OpenAI” layihəni qeyri-müəyyən müddətə təxirə salıb.

Gecikmənin əsas səbəbi şirkətin resurslarını başqa sahələrə yönəltməsi ilə əlaqələndirilir. Jurnalist Aleks Hitin əldə etdiyi məlumata görə, “OpenAI” hazırda erotik məzmunla bağlı funksiyalardan daha çox süni intellekt modelinin davranışını və istifadəçi ilə qarşılıqlı əlaqəsini inkişaf etdirməyə diqqət ayırır.

Şirkət istifadəçi ilə daha proaktiv əlaqə qura bilən, daha güclü “şəxsiyyətə” malik və daha yaxşı fərdiləşdirmə imkanları təqdim edən süni intellekt üzərində işləyir. Buna görə də texnologiya şirkəti “yetkin məzmun” funksiyasını aktiv etməzdən əvvəl sistemin intellekt səviyyəsini və istifadəçiyə uyğunlaşma qabiliyyətini daha da təkmilləşdirməyi seçib.

Süni intellekt sistemlərinin insanların fantaziyaları ilə əlaqələndirilməsi böyük iqtisadi potensial yaratsa da, eyni zamanda ciddi etik risklər doğurur.

Mütəxəssislər xüsusilə yetkinlik yaşına çatmayan şəxslərin belə məzmunlara çıxışının qarşısının alınmasının vacibliyini vurğulayırlar. Bundan əlavə, istifadəçilərin psixoloji vəziyyətinin qorunması məsələsi də diqqət mərkəzindədir.

Bu sahədə əvvəllər İlon Maskın “Grok” modeli ətrafında yaranan mübahisələr də mövzunun nə qədər həssas olduğunu göstərmişdi.

“OpenAI” istifadəçilərin öz qərarlarını vermək qabiliyyətinə malik olduğunu qəbul etsə də, şirkət təhlükəsizlik və etik standartlar tam təmin olunmadan belə bir funksiyanı istifadəyə vermək istəmir. 

Paşa Məmmədli