Retro oyunların yüksəlişi: Yeni startap 1 milyard dollar dəyərə yaxınlaşır

Müdafiə texnologiyaları sahəsində fəaliyyəti ilə tanınan Palmer Lakinin qurduğu retro oyun startapı “ModRetro”nun yeni investisiya raundu üçün təxminən 1 milyard dollar dəyər qiymətləndirməsi ilə danışıqlar apardığı bildirilir. 

Valyuta.az xəbər verir ki, u barədə “Financial Times” məlumat yayıb.

Məlumata görə, şirkət fəaliyyətini genişləndirmək və böyüməni sürətləndirmək məqsədilə investorlarla danışıqlar aparır.

“ModRetro” ilk məhsulunu 2024-cü ildə bazara təqdim edib. Şirkətin təqdim etdiyi “Chromatic” adlı əl oyun konsolu klassik “Game Boy” dizaynından ilhamlanması ilə diqqət çəkib.

“The Verge” nəşrinin yazarı Şon Hollister cihazın “indiyə qədər hazırlanmış ən yaxşı "Game Boy" versiyası ola biləcəyini” bildirib. Bununla yanaşı, o qeyd edib ki, cihazı qiymətləndirərkən Lakinin müdafiə texnologiyaları şirkəti “Anduril Industries”in qurucusu kimi reputasiyasını tamamilə nəzərə almamaq çətindir.

Hollister bu barədə maraqlı bir sual da səsləndirib: “Əgər "Lockheed Martin" bir "Game Boy" hazırlasaydı, onu alardınızmı?”

17 illik ideyanın nəticəsi

Palmer Laki ötən il açıqlamasında “Game Boy”dan ilhamlanan konsol ideyası üzərində təxminən 17 il ərzində fasilələrlə çalışdığını bildirib. Onun sözlərinə görə, “Chromatic” uzun illər davam edən bu prosesin nəticəsidir.

Laki konsolun hazırlanması zamanı yüzlərlə qeyri-adi qərar qəbul etdiyini deyərək cihazı belə təsvir edib: “Bu konsolun xüsusi edən hər bir detalı kompromisssiz və tamamilə orijinal bir ideyanın bayramıdır".

“Financial Times”ın məlumatına görə, “ModRetro” yalnız “Chromatic” ilə kifayətlənməyi planlaşdırmır. Şirkət hazırda “Nintendo 64” təcrübəsini yenidən yaratmağı hədəfləyən yeni cihaz üzərində də işləyir.

“Anduril” də böyük investisiya axtarır

Eyni zamanda Palmer Lakinin qurucusu olduğu müdafiə texnologiyaları şirkəti “Anduril Industries” də investisiya bazarında diqqət mərkəzindədir.

Məlumatlara görə, şirkət təxminən 60 milyard dollar dəyər qiymətləndirməsi ilə yeni investisiya raundu üçün danışıqlar aparır.

Bildirilir ki, ABŞ-da Donald Tramp administrasiyası Palmer Lakinin avtonom silah sistemləri ilə bağlı baxışlarına müsbət yanaşır və bu yanaşma “Anduril” şirkətinin inkişafına əlavə təkan verə bilər.

Paşa Məmmədli