Qarajdan 900 milyon dollarlıq şirkətə - İşçilərinin toyunu və təhsilini maliyyələşdirən sahibkar - SƏHƏR OXUSU

ABŞ-də fəaliyyət göstərən "Boxed" elektron ticarət şirkətinin qurucusu Çieh Huang biznes dünyasında fərqli yanaşması ilə diqqət çəkib. O, şirkətini qarajdan quraraq cəmi səkkiz il ərzində 900 milyon dollar dəyərində ictimai şirkətə çevirməyi bacarıb. Huangun biznes modeli isə yalnız gəlirə deyil, həm də işçilərin rifahına yönəlməsi ilə seçilir.

Valyuta.az xəbər verir ki, sahibkar şirkəti böyüdərkən işçilərə müxtəlif sosial dəstək proqramları təqdim edib. "Boxed"də çalışan əməkdaşlar üçün uşaqlarının kollec təhsili üçün maliyyə dəstəyi, toy kimi həyat hadisələri üçün subsidiya, həmçinin 500 dollarlıq fövqəladə yardım fondu mövcuddur.

Şirkətin anbarlarında işləyən əməkdaşlar saatda 12-15 dollar arası maaş alır və əlavə sosial imkanlardan yararlanırlar. Huang hesab edir ki, işçilərə investisiya qoymaq şirkətin uzunmüddətli uğurunun əsas faktorudur.

Elektron ticarət sektorunda bir çox şirkət maksimum effektivlik və xərclərin azaldılması üçün işçi qüvvəsindən maksimum istifadə etməyə çalışsa da, Huang fərqli yol seçib. Onun fikrincə, uğurlu şirkət qurmaq üçün “hər qəpiyi sıxmaq” mütləq deyil.

Şirkət əvvəlcə qarajdan fəaliyyət göstərərək məişət məhsullarının onlayn satışına fokuslanıb. Huang strategiya olaraq məhsul çeşidini məhdud saxlayıb və əsasən gündəlik istifadə olunan malları - məsələn, təmizləyici vasitələr, qida və məişət məhsullarını təklif edib.

Qarajdan birjaya qədər

2013-cü ildə qurulan "Boxed" qısa müddətdə böyüyərək yüzlərlə əməkdaşı olan şirkətə çevrilib. 2021-ci ildə isə şirkət xüsusi məqsədli birləşmə şirkəti (SPAC) vasitəsilə birjaya çıxaraq 900 milyon dollar dəyərində qiymətləndirilib.

Şirkətin rəhbərliyi bildirir ki, işçilərin şirkətdə orta iş müddəti təxminən 3 il təşkil edir ki, bu da logistika və anbar sektorunda nadir göstərici hesab olunur. Bu isə yeni işçilərin tez-tez işə götürülməsi və təlim xərclərinin azalmasına səbəb olur.

“Biznesi fərqli qurmaq mümkündür”

Huang deyir ki, onun əsas məqsədi gələcək nəsil sahibkarlara fərqli bir biznes modeli göstərməkdir.

“Şirkətdə çalışan insanlara yaxşı davranmaqla da uğurlu biznes qurmaq mümkündür. İşçilərə pulsuz tibbi sığorta vermək və eyni zamanda gəlir əldə etmək mümkündür", - deyə o bildirib.

Onun fikrincə, şirkətin ən böyük uğuru yalnız maliyyə nəticələri deyil, şirkət mədəniyyətinin formalaşdırılmasıdır. Huang hesab edir ki, güclü biznes qurmaq istəyən sahibkarlar ilk növbədə təşkilatın mədəniyyətini formalaşdırmalıdırlar.

Sərvanə Rəmixanova