Rəqsanə Məmmədova
Rəqəmsal marketinq və biznesin inkişafı üzrə menecer
Rəqəmsal marketinqdə influencerlərlə əməkdaşlıq getdikcə geniş yayılır. Seçim zamanı isə izləyicisi çox olana üstünlük verilməsi halları da az deyil. Burada əsas sual ortaya çıxır: izləyici sayı hər şeydirmi? Xüsusilə də həmin blogerin imici mübahisəli və ya zəifdirsə, bu, markanın reputasiyasına necə təsir edir?
İzləyici sayı brendinizə təsir etməyə bilər
Əslində, izləyici sayı yüksək olan, lakin imici müsbət olmayan bir blogerlə əməkdaşlıq qısa müddətdə satışa təsir edə bilər, lakin uzunmüddətli brend dəyərlərinə zərər vurmaq riski daşıyır. Məsələn, Türkiyədə bir neçə il öncə kosmetika markası "Farmasi" bir sıra qalmaqallı paylaşım və davranışları ilə tanınan blogerlərlə əməkdaşlıq etdikdən sonra sosial şəbəkələrdə istifadəçilər tərəfindən tənqid olunmuşdu. Nəticədə markanın bəzi müştəriləri onu dəstəkləmədiklərini açıq şəkildə bildirmiş, bu da brendin imicinə mənfi təsir etmişdi. Bu, onu deməyə əsas verir ki, bəzi hallarda qalmaqallı blogerlərlə əməkdaşlıq markanı auditoriyasından uzaqlaşdırır.
Brendi təqdim edən kimdir?
Bunun əksi olaraq, izləyici sayı az olan, amma auditoriyası ilə emosional bağlantı yaradan və etibar qazanan mikro-blogerlərlə əməkdaşlıq çox zaman daha uğurlu nəticələr verir. Məsələn, lüks və elit seqmentə xitab edən bir brendin davranışlarında qeyri-peşəkar olan bir influencerlə əməkdaşlıq etməsi brendin mövqeyini zəiflədə bilər. Müştəri təkcə məhsula deyil, onun təqdimatına və təqdim edən şəxslərə də diqqət edir.
Seçdiyiniz sima brendə uyğun olmalıdır
Son olaraq qeyd edim ki, məncə, influencer seçimi sadəcə statistikaya əsaslanmamalıdır. Əməkdaşlıq ediləcək blogerin dəyərləri, davranışı və auditoriya ilə münasibəti diqqətlə araşdırılmalıdır. Brendə uyğun olmayan bir sima ilə əməkdaşlıq qısamüddətli baxış sayı gətirə bilər, lakin uzunmüddətli imicə zərər vura bilər. Uğurlu brend strategiyası üçün əsas hədəf – izləyici sayından daha çox, etibar və uyğunluq olmalıdır.
