“PensionsEurope” rəhbəri: “Heç bir pensiya modeli təkbaşına bütün hədəflərə cavab verə bilməz”

​“Qlobal miqyasda əhalinin qocalması və əmək bazarının sürətlə dəyişməsi fonunda pensiya sistemlərinin dizaynı və onilliklər boyu bu sistemlərə olan etimadın qorunması ən böyük çağırışdır”. 

Valyuta.az xəbər verir ki, bunu XI Azərbaycan Beynəlxalq Sığorta Forumunda çıxış edən “PensionsEurope” təşkilatının rəhbəri Matti Leppälä deyib.

​Avropanın pensiya təcrübələrini bölüşən natiq, fərqli ölkələrin konkret göstəricilərini diqqətə çatdırıb.

O bildirib ki, Niderlandda tətbiq olunan sistem işçi qüvvəsinin 90%-dən çoxunu əhatə edir: "Bu ölkənin pensiya fondlarında toplanan vəsaitin həcmi 1,5 trilyon avrodan çoxdur və bu göstərici ilə Avropada birincidir. Niderlandda sistem İsveçrədəki kimi qanunla məcburi deyil, kollektiv müqavilələrə əsaslanır".

​M.Leppälä digər Şimal ölkələrinin də rəqəmlərini açıqlayıb. 

"İsveçdə kollektiv müqavilələrə əsaslanan peşə pensiyası sistemi artıq 100 ildir ki, fəaliyyət göstərir. Finlandiyada isə qazanca bağlı pensiya sistemində öhdəliklərin təxminən 25-30%-i fondlaşdırılır. Ən maraqlı məqam odur ki, bu vəsaitlər dövlət deyil, tamamilə özəl pensiya sığorta şirkətləri tərəfindən idarə olunur".

​Baş katib onu da əlavə edib ki, Fransa, İtaliya və İspaniya kimi ölkələr hələ də əsasən cari işçilərin ödənişlərinə (pay-as-you-go) arxalanırlar. 

Ekspert risklərin azaldılması üçün fərqli sütunları birləşdirən çoxsütunlu modelləri ən etibarlı sistemlər hesab edir.

Sərvanə Rəmixanova