"Nvidia" rəhbəri: Süni intellektin bəşəriyyətin sonunu gətirəcəyi iddiaları cəfəngiyatdır

ABŞ-ın "Nvidia" şirkətinin baş icraçı direktoru Censen Huan süni intellektin (Al) bəşəriyyətin sonuna səbəb olacağı və ya ABŞ-də iş yerlərinin yarısını məhv edəcəyi ilə bağlı narahatlıqları kəskin şəkildə tənqid edib.

Valyuta.az xəbər verir ki, bu barədə məlumatı "Axios" portalı yayıb.

“İddialar ki, süni intellekt bəşəriyyətin sonunu gətirəcək və ya ABŞ-da iş yerlərinin yarısını məhv edəcək, tamamilə cəfəngiyatdır”, deyə Huan bildirib.

"Nvidia" rəhbərinin sözlərinə görə, süni intellektlə bağlı əsassız qorxuların dövlət siyasətinə təsir etməsinə imkan verilməməlidir.

O hesab edir ki, yeni texnologiyalar ətrafında yaranan həddindən artıq emosional reaksiyalar onların inkişafını ləngidə və ölkənin rəqabət qabiliyyətini zəiflədə bilər.

"Nvidia" 1993-cü ildə yaradılmış ABŞ texnologiya şirkətidir və əsasən qrafik prosessorların (GPU) və digər çiplərin istehsalı ilə məşğuldur. Şirkətin baş ofisi Kaliforniya ştatının Santa-Klara şəhərində yerləşir.

"Nvidia"nın məhsulları süni intellekt, video oyunlar və avtomobil sənayesi də daxil olmaqla müxtəlif sahələrdə geniş istifadə olunur.

Paşa Məmmədli