MUFG analisti: "Sabit koinlər ödəniş vasitəsi kimi "Bitcoin"dən daha uyğundur"

Yaponiyanın ən böyük maliyyə qurumlarından biri olan Mitsubishi UFJ Financial Group (MUFG) analisti Li Hardman sabit koinlərlə bağlı diqqət çəkən açıqlama verib.

O bildirib ki, sabit koinlər bir çox hallarda "Bitcoin" və digər kriptovalyutalardan daha effektiv “pul funksiyası” yerinə yetirə bilir.

Valyuta.az xəbər verir ki, analistin sözlərinə görə, sabit koinlərin əsas üstünlüyü onların aşağı volatilliyə malik olmasıdır. Bu xüsusiyyət onları gündəlik ödənişlər üçün daha uyğun edir:

“Sabit koinlər aşağı dəyişkənliyə görə rəqəmsal nağd pul kimi işləyir. "Bitcoin" isə yüksək volatilliyi səbəbindən gündəlik ödəniş vasitəsi kimi risklidir. Sabit koinlər həm sürətli, həm də daha ucuz əməliyyat imkanı yaradır”.

Hardman əlavə edib ki, xüsusilə inflyasiyanın yüksək olduğu ölkələrdə sabit koinlərdən daha geniş istifadə olunur və beynəlxalq pul köçürmələrində onlar ənənəvi bank sistemləri ilə müqayisədə daha aşağı xərc tələb edir.

Bununla yanaşı, analist "Bitcoin"in rolunu da inkar etməyib. O qeyd edib ki, "Bitcoin" daha çox dəyər saxlama vasitəsi kimi qiymətləndirilə bilər, lakin yüksək qiymət dəyişkənliyi onun gündəlik ödəniş aləti kimi istifadəsini məhdudlaşdırır.

Mütəxəssislərin fikrincə, rəqəmsal maliyyə ekosistemində sabit koinlər ödəniş infrastrukturu, "Bitcoin" isə alternativ aktiv sinfi kimi fərqli funksiyaları yerinə yetirməyə davam edəcək.

Sərvanə Rəmixanova