Micron rekord qırdı: Bazar dəyərinə görə "Tesla" və "Meta"nı geridə qoydu

Süni intellekt sahəsində davam edən güclü yüksəliş yaddaş çipi istehsalçısı "Micron Technology"nin bazar dəyərini rekord səviyyəyə çatdırıb.

Valyuta.az xəbər verir ki, son bir il ərzində şirkətin səhmləri təxminən 900% bahalaşıb. Bugünkü ticarət sessiyasında isə "Micron" səhmləri 15%-dən çox artaraq 1 255 dollara yüksəlib və tarixi maksimumunu yeniləyib.

Bu yüksəliş nəticəsində şirkətin bazar dəyəri 1,402 trilyon dollara çataraq 1,401 trilyon dollarlıq "Tesla" və 1,37 trilyon dollarlıq "Meta" şirkətlərini geridə qoyub. Bununla da "Micron" dünyanın ən dəyərli şirkətləri siyahısında 11-ci pilləyə yüksəlib.

Əvvəllər süni intellekt sahəsində əsas diqqət yüksək hesablama gücünə malik prosessorlara yönəlmişdi. Lakin AI ekosistemi genişləndikcə yüksək sürətli operativ yaddaş (RAM) və böyük həcmli məlumat saxlama həllərinə tələbat da sürətlə artıb. Bu isə "Micron" kimi yaddaş çipi istehsalçılarının əhəmiyyətini daha da artırıb.

Şirkətin məhsulları süni intellekt üçün qurulan iri məlumat mərkəzlərində geniş istifadə olunur. Xüsusilə Nvidia ilə yanaşı "Micron"un yaddaş həlləri AI infrastrukturunun vacib komponentlərindən birinə çevrilib.

"Micron" son dövrdə 16 strateji və uzunmüddətli müqavilə imzalayıb. Bu müqavilələr şirkətə ümumilikdə 100 milyard dollar məbləğində təminatlı gəlir qazandıracaq. Məlumata görə, bu vəsaitin 22 milyard dolları əvvəlcədən ödənilib.

Qeyd edək ki, 1978-ci ildə əsası qoyulan "Micron" bu müqavilələr sayəsində tarixinin ən yüksək ümumi mənfəət göstəricilərindən birini əldə edib.

Sərvanə Rəmixanova