“Meta” “Forum” adlı yeni tətbiq istifadəyə verdi

“Meta” “Facebook Groups” üçün nəzərdə tutulmuş ayrıca “Forum” adlı yeni tətbiqini səssiz şəkildə təqdim edib.

Valyuta.Az-ın verdiyi xəbərə görə, şirkət tətbiqi “daha dərin müzakirələr, real cavablar və istifadəçilərin maraq göstərdiyi icmalar üçün yaradılmış xüsusi məkan” kimi təsvir edərək onu “Reddit”ə bənzər platforma kimi mövqeləndirir.

Tətbiqin ilk dəfə sosial media məsləhətçisi Mett Navarra (Matt Navarra) tərəfindən aşkar edildiyi bildirilir.

İstifadəçilər “Facebook” hesabı ilə daxil olduqdan sonra “Forum” mövcud qrupları, profil və fəaliyyət məlumatlarını yükləyir. Standart “Facebook” tətbiqində olduğu kimi, istifadəçilər ləqəblə paylaşım edə bilirlər. “Meta” bildirib ki, qruplar yenə də “Facebook” platformasında qalır və “Forum” üzərindən edilən bütün paylaşımlar “Facebook” qruplarında da görünəcək.

Şirkətin sözlərinə görə, “Forum” lentləri qruplardakı söhbətlər üzərində qurulub və istifadəçilərə “sadəcə trend olanları deyil, real insanların nə danışdığını” görməyə imkan verir. Eyni zamanda tətbiq istifadəçilərin əvvəl yarımçıq saxladıqları müzakirələrə asanlıqla qayıtmasını təmin edir.

Tətbiqdə süni intellektlə işləyən “Ask” bölməsi də mövcuddur. Bu funksiya istifadəçilərə sual verməyə və müxtəlif qruplardakı müzakirələr əsasında hazırlanmış cavablar almağa imkan yaradır. Bundan əlavə, qrup idarəçilərinə qrupları idarə etmək və məzmun moderasiyasını həyata keçirməkdə kömək edən süni intellekt assistenti də təqdim olunub.

Bu, “Meta”nın qruplar üçün ilk ayrıca tətbiqi deyil. Şirkət hələ 2014-cü ildə istifadəçilərin qruplar arasında məzmun paylaşmasını asanlaşdırmaq məqsədilə xüsusi “Groups” tətbiqini təqdim etmişdi. Lakin həmin layihə 2017-ci ildə bağlanmışdı.

“Forum” son həftələrdə “Meta” tərəfindən təqdim olunan iki yeni tətbiqdən biridir. Ötən ay şirkət “Instagram” dostları ilə yoxa çıxan fotolar paylaşmağa imkan verən “Instants” tətbiqini də istifadəyə vermişdi.

“Instants” və “Forum” “Meta”nın daha çox tətbiq təqdim etmək strategiyası fonunda ortaya çıxıb. “The Wall Street Journal” bir neçə həftə əvvəl yazmışdı ki, şirkətin baş icraçı direktoru Mark Zukerberq (Mark Zuckerberg) əməkdaşlara bildirib ki, süni intellektin yaratdığı səmərəlilik sayəsində “Meta” artıq əvvəlki dövrlərlə müqayisədə daha çox tətbiq təqdim etməyi hədəfləyir.

Məlumata görə, Zukerberq şirkətin məhsul direktoru Kris Koksu (Chris Cox) nəzərdə tutaraq belə deyib: “Krislə birlikdə müzakirə edirdik ki, 50 yeni tətbiq hazırlaya bilərikmi? Bəli, yəqin ki, edə bilərik. Amma əvvəlcə birdən-birə 50 tətbiq hazırlamağa çalışmaq əvəzinə bir neçə layihə ilə başlamalıyıq.”

Bununla belə, “Meta” istehlakçıların daha çox tətbiq istədiyini düşünsə də, bunun tam əksinin doğru ola biləcəyi qeyd olunur. Xüsusilə də şirkətin yeni tətbiqlərinin əksəriyyəti digər populyar xidmətlərin bənzəri hesab edilir. Məsələn, “Instants” “BeReal” və “Snapchat” ideyalarından istifadə edir, ötən il təqdim edilən “Meta Edits” isə əsasən “ByteDance” şirkətinin “CapCut” tətbiqinin oxşarı sayılır.