Messi və komanda yoldaşları Bakıya gəlir - Bilet qiymətləri

ABŞ-nin "İnter Mayami" klubunun futbolçusu Lionel Messi komanda yoldaşları - Luis Suares, Serxio Buskets və Jordi Alba ilə birlikdə Bakıya gəlir.

Valyuta.az xəbər verir ki, dekabrın 11-də Bakı Kristal Zalında keçiriləcək tədbirdə pərəstişkarlar dünyanın ən yaxşı futbolçusu - dünya çempionu, səkkiz dəfə "Qızıl top" mükafatı qazanan Lionel Messi və komanda yoldaşlarını görmək imkanı qazanacaqlar.

İştirakçılar Messinin futbol həyatını və mübarizəsini əks etdirən filmi izləyəcəklər. Filmdə izləyicilərə futbol ulduzunun həyatı və karyerası ilə bağlı unikal anlar təqdim ediləcək.

Bakı Kristal Zalının səhnəsində dünyaşöhrətli bəstəkar və müğənni Villi Uilyam, məşhur "Morandi" qrupu çıxış edəcəklər.

Görüşdə iştirak etmək üçün biletlərin qiyməti 10-50 manat arasında dəyişir. Fan zonada qiymətlər 10 manat, sağ ayaqüstü zonada qiymətlər 50 manat, sektorlarda isə qiymət 15-50 manat arasındadır.

Biletlərin satışından əldə olunan vəsait xeyriyyə məqsədinə yönəldiləcək.