Məşhur "YouTuber"lər bu dəfə "Snap"a qarşı iddia qaldırdı

Bir qrup "YouTuber" videolarının icazələri olmadan süni zəka modellərinin öyrədilməsində istifadə olunduğunu iddia edərək texnologiya şirkətlərinə qarşı açdıqları iddialara bir yenisini əlavə edib. 

Valyuta.az xəbər verir ki, bu dəfə iddianın ünvanı “Snap” olub.

Təxminən 6,2 milyon abunəyə malik üç "YouTube" kanalının arxasındakı yaradıcılar “Snap”ın süni intellekt sistemlərini öz videoları üzərində öyrətdiyini iddia edir. Bu sistemlərin istifadəçilərin mətn komandaları ilə şəkilləri redaktə etməsinə imkan verən “Imagine Lens” kimi tətbiq içi xüsusiyyətlərdə istifadə olunduğu bildirilir. İddiaçılar bundan əvvəl də oxşar səbəblərlə “Nvidia”, “Meta” və “ByteDance” şirkətlərinə qarşı iddia qaldırmışdı.

ABŞ-ın Kaliforniya Mərkəzi Rayon Məhkəməsinə cümə günü təqdim olunan və toplu iddia kimi qiymətləndirilən ərizədə "YouTuber"lər “Snap”ın HD VILA 100M adlı böyük həcmli video dil məlumat dəstini və digər oxşar məlumat dəstlərini istifadə etdiyini iddia edir. İddia edilənə görə, bu məlumat dəstləri yalnız akademik və tədqiqat məqsədləri üçün nəzərdə tutulmuşdu.

İddialara görə, “Snap” bu məlumat dəstlərini ticarət məqsədilə istifadə etmək üçün "YouTube"un texnoloji qorunmalarını, xidmət şərtlərini və lisenziya məhdudiyyətlərini keçməyin yollarını tapıb. Qaydalar açıq şəkildə məzmunların ticarət istifadəsini qadağan edir. İddia ərizəsində müəllif hüquqlarının pozulmasının dayandırılması üçün daimi tədbir və eyni zamanda hüquqi kompensasiya tələb olunur.

İddianın öncülüyünü 5,52 milyon abunəyə malik “h3h3” "YouTube" kanalının yaradıcıları üzərinə götürüb. Onlara “MrShortGame Golf” və “Golfholics” adlı daha kiçik, golf mövzulu kanallar qoşulub. Bu iş, məzmun yaradıcıları ilə süni zəka modeli inkişaf etdirən şirkətləri qarşı-qarşıya gətirən çoxsaylı iddialardan yalnız biridir. Nəşriyyatlar, yazarlar, qəzetlər, istifadəçi yaradıcılığı platformaları və sənətçilər də oxşar müəllif hüquqları mübahisələri ilə məhkəməyə müraciət edən qruplar arasındadır.

Qeyd edək ki, bu, "YouTuber"lərin açdığı ilk iddia deyil. “Copyright Alliance” məlumatına görə, süni zəka şirkətlərinə qarşı bu günə qədər 70-dən çox müəllif hüquqları iddiası qaldırılıb.

Bəzi işlərdə məhkəmələr texnologiya şirkətləri tərəfində qərar verib. “Meta” ilə bir qrup yazar arasındakı dava buna misal göstərilir. Digər tərəfdən, “Anthropic” ilə bir qrup yazar arasındakı işdə tərəflər razılaşmağa gəlib və ödəniş həyata keçirilib. Bir çox iddia isə hələ də məhkəmə prosesindədir.

Paşa Məmmədli