"Nvidia" süni intellekt şirkətinə 2 milyardlıq investisiya yatırdı

"Nvidia" süni intellekt yönümlü bulud infrastrukturu şirkəti "CoreWeave"ə 2 milyard dollar sərmayə yatırdığını açıqlayıb.

Valyuta.az xəbər verir ki, "Nvidia" "CoreWeave"in A sinifli səhmlərini hər səhm üçün 87,20 dollar qiymətindən satın alıb.

Razılaşma çərçivəsində tərəflər “süni intellekt fabrikləri” kimi təqdim olunan yeni veri mərkəzləri qurmağı planlaşdırır. Bu mərkəzlərdə "Nvidia"nın məhsullarından istifadə ediləcək. "CoreWeave" platformasına Rubin çip arxitekturası, "BlueField sistemləri və "Vera CPU" seriyası inteqrasiya olunacaq.

Qeyd edək ki, saziş xəbərindən sonra "CoreWeave"in səhmləri 15 faizdən çox bahalaşıb. Razılaşmanın şirkətin 2030-cu ilə qədər 5 giqavattdan artıq süni intellekt hesablama gücü artırmaq planlarını sürətləndirəcəyi bildirilir.

Sərvanə Rəmixanova