100 mindən çox "Chrome" istifadəçisi təhlükədədir: Bu əlavələri dərhal silin

“Symantec” tədqiqatçıları tərəfindən aşkarlanan bu zərərli alətlər ümumilikdə 100 mindən çox kompüterə yayılıb. Bu əlavələr panodakı məlumatları oğurlamaqdan brauzer sessiyalarını ələ keçirməyə qədər geniş spektrli kibercinayət fəaliyyətləri həyata keçirə bilir və istifadəçilərin rəqəmsal təhlükəsizliyini səssiz şəkildə təhdid edir.

Valyuta.az xəbər verir ki, Aaşkarlanan riskli əlavələr arasında xəbər hazırlanarkən belə mağazada yüklənə bilən “Good Tab” diqqət çəkir. Bu əlavə istifadəçiyə məlumat vermədən kopyaladığınız bütün məzmunlara giriş və onları dəyişdirmə icazəsinə malikdir. Bu isə yalnız parolların oğurlanması deyil, həm də kriptovalyuta köçürməsi zamanı kopyalanmış pul kisəsi ünvanının hücumçunun ünvanı ilə dəyişdirilməsi kimi ciddi maliyyə riskləri yaradır.

Bənzər təhlükə yaradan digər əlavə isə “Stock Informer”dir. Tərkibindəki kritik təhlükəsizlik boşluğu uzaqdan giriş əldə edən hücumçulara istifadəçi kompüterində istədikləri kodu işə salmağa imkan verir. Bu əlavə də hələ aktiv şəkildə yayılmaqda davam edir.

Bəzi əlavələr “Google” tərəfindən mağazadan silinsə də, quraşdırıldıqları cihazlarda fəaliyyətini davam etdirir. Məsələn, “Children Protection” adlı tətbiq zahirən uşaqların qorunması üçün nəzərdə tutulmuş alət kimi təqdim olunsa da, əslində tam funksiyalı idarəetmə mərkəzi kimi işləyir. Brauzer çərəzlərini toplayaraq sessiyaları oğurlayır və uzaqdan göndərilən əmrlərlə istənilən vaxt zərərli proqrama çevrilə bilir.

“DPS Websafe” isə məşhur reklam bloklayıcı “Adblock Plus”ın ikonlarını təqlid edərək istifadəçiləri aldadır, axtarış nəticələrini dəyişdirir və istifadəçi fəaliyyətini izləyir.

Mütəxəssislər xəbərdarlıq edir ki, rəsmi mağazada yer almaq tətbiqin mütləq təhlükəsiz olduğu anlamına gəlmir. Yuxarıda adı çəkilən əlavələrin vaxt itirmədən sistemlərdən silinməsi tövsiyə olunur. Rəqəmsal gigiyenanı qorumağın ən etibarlı yolu əlavələrin sayını minimuma endirmək və yalnız zəruri, etibarlı tarixçəsi olan alətlərdən istifadə etməkdir. Bəzən “təsdiqlənmiş” nişanı belə hücumçular üçün ən güclü gizlənmə vasitəsinə çevrilə bilər.

Paşa Məmmədli