ARDNF-in Avropa ölkələri üzrə investisiya portfeli azalıb

Azərbaycan Dövlət Neft Fondunun (ARDNF) investisiya portfelinin dəyəri 2025-ci il yanvarın 1-nə 73 milyard 539,7 milyon ABŞ dolları təşkil edib.

Valyutaa.z xəbər verir ki, bu, ötən ilin eyni dövrü ilə müqayisədə 13 milyard 510,2 milyon dollar və ya 22,5 % artım deməkdir.

Müvafiq göstərici 2024-cü ilin əvvəlində 60 milyard 29,5 milyon dollar olub.

Hesabat dövründə portfelin regionlar üzrə bölgüsündə bir sıra dəyişikliklər baş verib. Avropa ölkələrinin payı 25,9 % təşkil edib ki, bu da əvvəlki illə müqayisədə 4,8 faiz bəndi azalma deməkdir. Qeyd edək ki, 2024-cü ilin əvvəlində bu göstərici 30,7 % idi.

Şimali Amerika üzrə investisiyalar 4,1 faiz bəndi azalaraq 23,9 %-ə (əvvəl 28,0 %), Asiya regionu üzrə isə 4,9 faiz bəndi azalaraq 8 %-ə (əvvəl 12,9 %) enib.

Əvəzində Yaxın Şərq üzrə investisiyalar 0,8 faiz bəndi artaraq 1,4 %-ə (əvvəl 0,6 %), Avstraliya və Yeni Zelandiya üzrə isə 0,2 faiz bəndi artaraq 0,9 %-ə (əvvəl 0,7 %) çatıb. Latın Amerikası regionunun payında dəyişiklik olmayıb və 0,1 % olaraq qalıb.

Fondun strukturunda beynəlxalq maliyyə təşkilatlarının payı 4,8 faiz bəndi azalaraq 1,6 % olub. Ən kəskin artım isə qızıl aktivlərində qeydə alınıb - bu göstərici 17,6 faiz bəndi yüksələrək 38,2 %-ə çatıb.

Mayya Hüseynova