Banklar saat 5-dən sonra niyə müştəri qəbul etmir?

Bir çox vətəndaş gün ərzində banklara 17:00-dan sonra müraciət edə bilirlər. Lakin bu zaman onların qarşılaşdığı əsas problemlərdən biri, bank filiallarına daxil ola bilməmələridir. Halbuki bir çox bank filiallarının girişində iş saatı 09:00–18:00 kimi göstərilir.

Bu isə vətəndaşlarda suallar yaradır: əgər bank saat 18:00-a qədər açıqdırsa, niyə müştərilər saat 17:00-dan sonra içəri buraxılmır? Xidmət niyə rəsmi saatdan daha tez dayandırılır?

Bank məsələləri üzrə ekspert Əkrəm Həsənov Valyuta.az-a bildirib ki, səbəb kassa qovşağı ilə bağlıdır:

"Banklarda iş günü saat 18:00-da başa çatır və bu, həm də əmək qanunvericiliyinə uyğun olaraq işçilərin iş vaxtının bitməsi deməkdir. Belə olan halda, işçilər saat 18:00-dan sonra iş yerində qala bilməzlər. Bank da maliyyə təşkilatı olduğu üçün kassa qovşağı müəyyən prosedurlara əsasən bağlanmalıdır.

Kassa bağlanması bir neçə dəqiqə ərzində həyata keçirilmir. Kassada olan vəsaitin sayılması, yoxlanması, sənədləşdirilməsi və günün maliyyə yekunlarının təsdiqlənməsi vaxt tələb edir. Bu proses, adətən, azı 30–40 dəqiqə çəkir. Kassa qovşağının bağlanması yalnız pulların fiziki yoxlanması ilə bitmir, həmçinin gün ərzində aparılmış bütün əməliyyatların, o cümlədən müştərilərlə bağlı məlumatların yekunlaşdırılması və sistemə daxil edilməsi ilə müşayiət olunur. Bu yalnız Azərbaycanda deyil, bütün dünyada tətbiq edilən standart bank prosedurudur".

Mayya Hüseynova