İşğaldan azad edilən ərazilərdə işlə təmin olunan vətəndaşların sayı məlum olub

“İşğaldan azad olunmuş ərazilərə köçən vətəndaşlarımızın 58 faizi dövlət, 42 faizi isə özəl sektorda çalışır.”

Valyuta.az xəbər verir ki, bunu Əmək və Əhalinin Sosial Müdafiəsi Nazirliyi tabeliyində Dövlət Məşğulluq Agentliyinin İdarə Heyətinin sədri Hasil Abbasov Agentlikdə ötən ilin yekunları və 2026-cı il üçün hədəflərə həsr olunmuş mətbuat konfransında çıxışı zamanı bildirib.

Onun sözlərinə görə, aktiv məşğulluq tədbirlərindən biri olan peşə hazırlığı proqramları işğaldan azad olunmuş ərazilərdə də tətbiq edilir. Belə ki, 152 nəfər peşə hazırlığına cəlb olunaraq müvafiq qaydada işlə təmin edilib.

Ümumilikdə isə işğaldan azad olunmuş ərazilərdə peşə hazırlığına cəlb edilən vətəndaşların sayı 360 nəfərə çatıb.

Qeyd edilib ki, 2025-ci ildə işğaldan azad olunmuş ərazilərdə 18 əmək yarmarkası keçirilib. Bununla da həmin ərazilərdə təşkil olunan əmək yarmarkalarının ümumi sayı 26-ya yüksəlib.

Bildirilib ki, 2026-cı ildə də bu prosesin davam etdirilməsi nəzərdə tutulur.

Sərvanə Rəmixanova