"Məhsulunun "Premium" olduğunu deyirsənsə, bunu sübut etməlisən"

Mağazada rəflər arasında seçim edərkən çox vaxt eyni mənzərə ilə qarşılaşırıq: satıcı bizə büdcəmizə uyğun variantı deyil, onun daha baha alternativlərini - “A klass” və ya “Premium” seriyasını tərifləməyə başlayır. Və məhsul üzərindəki iki kəlmə – “Premium” və ya “A klass” – bizim məhsula baxış bucağımızı kökündən dəyişir. Sanki bu sözlər həmin malın digərlərindən qat-qat üstün olduğuna bizi inandırır. 

Amma heç düşünmüsünüzmü, bu ifadələr həqiqətən bir keyfiyyət pasportudur, yoxsa sadəcə bizim daha çox pul ödəməyimiz üçün qurulmuş marketinq tələsi?

Marketoloq Samir Mehdiyev Valyuta.az-a bildirir ki, “Premium” və “A klass” sözləri həm faydalıdır, həm də çox rahat sui-istifadə olunan anlayışlardır:

“İnsan psixologiyası belə qurulub ki, biz bu cür sözləri görəndə avtomatik olaraq məhsulu daha keyfiyyətli və daha etibarlı hesab edirik. Hətta bəzən heç texniki xüsusiyyətlərə belə baxmırıq. Bu, artıq illərlə formalaşmış bir davranışdır və brendlər bunu çox yaxşı anlayır. Əgər məhsul doğrudan da fərqlənirsə, məsələn, daha yaxşı materialdan hazırlanıbsa, istehsal prosesi daha ciddi nəzarətdədirsə, istifadə müddəti uzundursa və ya əlavə rahatlıq verirsə, o zaman “premium” demək tam yerindədir. Bu halda bu söz sadəcə reklam yox, real dəyərin qısa ifadəsidir. Amma reallıqda çox vaxt fərq bu qədər aydın olmur. Eyni zavodda istehsal olunan, eyni keyfiyyətə yaxın məhsullar fərqli qablaşdırma və brend adı ilə “premium” kimi təqdim olunur və qiymət xeyli artırılır. Burada artıq söhbət keyfiyyətdən yox, imicdən gedir”.

“Digər tərəfdən bazarda o qədər çox məhsul “premium” adlandırılır ki, bu sözün çəkisi get-gedə azalır. Əvvəllər fərqləndirici idi, indi isə demək olar standart ifadəyə çevrilib. Nəticədə alıcı daha skeptik yanaşmağa başlayır və bu da uzun müddətdə brendlərə etimadı zəiflədir. Marketinq baxımından bu strategiya qısa müddətdə satış gətirə bilər, amma əgər arxasında real keyfiyyət yoxdursa, müştəri bunu gec-tez anlayır və bu artıq brend üçün mənfi təsir yaradır. Çünki bir dəfə aldadılmış müştərini geri qaytarmaq çox çətin olur. Mənim yanaşmam belədir ki, “premium” sözünü işlətmək olar, amma onu sübut etmək lazımdır. Yəni konkret səbəb olmalıdır ki, niyə bu məhsul digərlərindən daha yaxşıdır. Əgər bunu sadə və aydın şəkildə izah edə bilmirsənsə, deməli, bu artıq marketinq oyunu səviyyəsində qalır. Yekunda deyə bilərəm  ki bu anlayışlar nə tam yalandır, nə də tam həqiqət, hər şey onların necə istifadə olunmasından asılıdır. Alıcı üçün isə ən düzgün yol emosiyaya yox, faktlara baxmaqdır. Çünki əsl keyfiyyət reklamda yox, istifadə zamanı hiss olunur” - deyə marketoloq qeyd edir.

Tənzilə Ağabalayeva