Marketinqdə kreativlik niyə azalıb?

Anar Bayramov,
“SAT Group” şirkətinin həmtəsisçisi, idarəçi və biznes konsultant

Son 20 ildə uzun illər dillər əzbəri olmuş “marketinq təkcə reklamdan ibarət deyil” şüarı çox populyar olsa da, elə xüsusilə həmin illər (2000-2015) ərzində marketinqin özəyini reklam (marketinq kommunikasiyası) təşkil edib. Bu dövrdə yarış kommunikasiya müstəvisində getdiyi üçün kreativliyə, kreativ asset-lərə tələbat çox idi. Ənənəvi marketinq agentlikləri (xüsusilə kreativ agentliklər) kef edirdilər.   

Şərti olaraq 2015-dən sonra “marketinq təkcə reklamdan ibarət deyil” şüarının aktuallığı zəifləyə-zəifləyə marketinq əsl yerini almağa başlayır. Daha ölçüləbilir, daha nöqtə atışlı, daha hesab-kitablı, araşdırmalı, analitika ağırlıqlı marketinq kök salır. Bu “era”da (digital era) marketinq kommunikasiyası, kreativ reklamlar yenə marketinqin önəmli elementi (drayveri) olsa da, marketinqin özəyi olmaqdan çıxıb. Yarış o meydançada getmir. Marketinqdə ciddi “qabıq dəyişikliyi” və “struktur dəyişikliyi” baş verib. Ona görə əvvəlki qədər kreativlik marketinqin mərkəzində deyil. Amma, təbii ki, rəqabət artdıqca kreativliyə də daha çox ehtiyac olur və olacaq. 

Başqa sözlə desək, əvvəl marketinq “oyunu” başqa meydançada oynanılırdı, orda kreativ kommunikasiya çox önəmli idi. İndi meydança dəyişilib, burda kreativlik işin özəyindən daha çox qırağındadır və nisbətən bahalı alətdir. Daha “ucuz”, əlçatan, eyni zamanda daha birbaşa təsirli alətlər istifadə olunduqca lazım olan qədər işə kreativlik qatılır.