İşçi xəstədirsə, işəgötürən onu işdən çıxara bilərmi?

Hər hansı bir qurumda çalışan işçi xəstələndikdə, uzun illər ərzində tətbiq olunan qaydalara görə, o, xəstəlik müddətində işdən azad edilə bilməzdi. Lakin son dövrlərdə praktikada bu qaydanın dəyişdiyi müşahidə olunur.

Xüsusilə işlə bağlı olmayan səbəblərdən əmək qabiliyyətini itirib və 5 ay, hətta 1 il müddətində işləyə bilməyəcək. 

İşçi xəstəlik səbəbindən işə çıxa bilmirsə, işəgötürən onu işdən azad edə bilərmi və bu hansı müddətdən sonra mümkündür?

Mövzu ilə bağlı Valyuta.az-a açıqlamasında Vətəndaşların Əmək Hüquqlarını Müdafiə Liqasının rəhbəri Sahib Məmmədov bildirib ki, işçi müvəqqəti əmək qabiliyyətini itirmə ilə əlaqədar 5 ay müddətində müalicədə olacaqsa və bunu təsdiq edən müvafiq rəsmi sənədləri təqdim edərsə, bu halda onunla əmək müqaviləsinə xitam verilə bilməz:

"Əmək Məcəlləsinin 74-cü maddəsinin “c” bəndinə əsasən, qanunvericilikdə daha uzun müddət müəyyən edilməyibsə, işçinin əmək qabiliyyətini fasiləsiz olaraq 6 aydan çox müddətə tam itirməsi və bu səbəbdən əmək funksiyasını yerinə yetirə bilməməsi hallarında işəgötürən əmək müqaviləsinə xitam verə bilər. Bu qərarın verilməsi üçün mütləq şəkildə müvafiq səlahiyyətli orqanın, o cümlədən tibbi-sosial ekspert komissiyasının rəyinin olması tələb olunur. Eyni zamanda, qanunvericilikdə istisna hallar da mövcuddur. Belə ki, bəzi xəstəliklər üzrə əmək qabiliyyətinin itirilməsi müddəti 1 ilə qədər müəyyən edilə bilər və bu hal bütün xəstəliklərə şamil edilmir".

"Bir qayda olaraq, əmək qabiliyyətinin fasiləsiz şəkildə 6 aydan çox müddətə itirilməsi hallarında işəgötürənin Əmək Məcəlləsinin 74-cü maddəsinin “c” bəndinə əsasən işçi ilə əmək müqaviləsinə xitam vermək hüququ yaranır", - deyə S.Məmmədov vurğulayıb.

Mayya Hüseynova