Daha bir ölkə avroya keçir - 145 yaşlı milli valyuta tarixə qovuşur

Təxminən 145 illik tarixə malik Bolqarıstan levi ölkənin gələn il Avrozonaya daxil olması ilə dövriyyədən çıxacaq və yerini avroya verəcək.

Valyuta.az xəbər verir ki, ilk dəfə 1881-ci ildə çap edilərək tədavülə buraxılan Bolqarıstan levi 1 yanvar 2026-cı ildən etibarən rəsmi pul vahidi statusunu itirəcək.

Bolqarıstanın Avropa İttifaqına üzvlüyü çərçivəsində birliyin ortaq pul vahidi olan avroya keçid prosesi 1 yanvar 2026-cı ildə başlayacaq. Bununla da ölkədə yerli pul vahidi olan Bolqarıstan levinin istifadəsi dayandırılacaq və avro tədavülə buraxılacaq.

Bolqarıstan avroya keçdikdən sonra bir ay müddətində ölkədə həm lev, həm də avro paralel şəkildə dövriyyədə olacaq. Bu müddət başa çatdıqdan sonra levin istifadəsi tam dayandırılacaq. Bununla belə, vətəndaşlar əllərində olan pulları müəyyən edilmiş sabit məzənnə üzrə vaxt məhdudiyyəti olmadan avroya dəyişdirə biləcəklər.

İyul ayında Aİ-yə üzv ölkələrin Bolqarıstanın 1 yanvar 2026-cı ildə avroya keçidini təsdiqləməsi ölkədə müsbət qarşılanmışdı. Baş nazir Rosen Jelyazkov mətbuata açıqlamasında bildirmişdi: "Biz buna nail olduq. Bolqarıstan 1 yanvar 2026-cı ildən etibarən avroya keçəcək. Bu uğura töhfə verən bütün qurumlara təşəkkür edirəm".

Bolqarıstanın maliyyə naziri Temenujka Petkova isə Avrozonaya keçiddən sonra 1 avronun məzənnəsinin 1,95583 lev səviyyəsində müəyyən ediləcəyini və bu göstəricinin sabit saxlanılacağını açıqlayıb.

Paşa Məmmədli