“İş yoldaşlarının rəhbərliyə gətirilməsi kollektivdə psixoloji çətinliklər yarada bilər”

Bəzən rəhbər seçilərkən şirkətin içindən seçilir ki, o artıq şirkətin iş prosesini, mexanizmini bilir.  Amma işçilərin rəhbər seçilən iş yoldaşını rəhbər kimi qəbul etməsi çətin olur, rəhbər gözü ilə görə bilmirlər. Şirkət içindən rəhbər seçmək nə dərəcə də düzgündür? Bu zaman nələr nəzərə alınmalıdır?

Valyuta.az-a danışan SAT Group şirkətinin həmtəsisçisi, idarəçi və biznes konsultant Anar Bayramov bildirir ki, şirkət daxilindən rəhbər seçilməsi bir sıra mühüm nüansları ehtiva edir.

Onun sözlərinə görə, daxili kadrın rəhbər vəzifəyə irəli çəkilməsinin əsas müsbət tərəflərindən biri əməkdaşın şirkətə bağlılığının artmasıdır: “İşçi öz inkişaf yolunu həmin qurum daxilində görə bildikdə motivasiyası yüksəlir. Bu yanaşma eyni zamanda digər əməkdaşlara da açıq mesaj verir ki, şirkətdə real nəticə göstərən və əməyilə seçilən şəxslər irəli çəkilir. Bu, yalnız şüar olaraq deyil, praktikada tətbiq edildikdə daha təsirli olur”.

Ekspert deyir ki, istər rəhbər kənardan gəlsin, istərsə də daxildən seçilsin, hər iki halda onun üçün ciddi rəhbərlik sınağı başlayır: “Xüsusilə eyni şöbədə uzun müddət birgə çalışmış əməkdaşlardan birinin statusunun dəyişməsi kollektivdə psixoloji çətinliklər yarada bilər. Bu vəziyyətdə yalnız rəsmi təyinatla işçilərin onu rəhbər kimi qəbul edəcəyini gözləmək düzgün yanaşma deyil”.

A.Bayramovun fikrincə, bu mərhələdə əsas məsələ ədalət prinsipidir: “İşçilər başa düşməlidirlər ki, rəhbər təyinatı hansı meyarlara və nəticələrə əsasən həyata keçirilib. Bu anlayış formalaşdıqdan sonra prosesin uğuru artıq seçilmiş rəhbərin davranışından asılı olur”.

Ekspert əlavə edir ki, yeni rəhbər komanda ilə ünsiyyəti düzgün qurmalı, vəzifə dəyişikliyindən sonra münasibətlərdə kəskin dəyişiklik yaratmamalıdır: “Kommunikasiya “biz bir komandayıq və ümumi hədəflərə birlikdə çatırıq” prinsipi üzərində qurulmalıdır. Dostcasına münasibətlə tələbkarlıq arasında balansın qorunması çətin olsa da, açıq və səmimi ünsiyyət bu tarazlığı təmin edir”.

Ekspert son olaraq qeyd etdi ki, demokratik idarəetmə modeli yalnız insani münasibətlər və sərbəstliklə deyil, eyni zamanda aydın tələblərlə effektiv olur: “Xüsusilə rəhbərliyin ilk günlərində diqqətli davranmaq, süni məsafə saxlamamaq vacibdir. Çünki süni məsafə etimadın azalmasına və kollektiv daxilində əlavə problemlərin yaranmasına səbəb ola bilər”.

Sərvanə Rəmixanova