İmmiqrantın biznes ideyası necə qlobal banka çevrildi? - SƏHƏR OXUSU

"Goldman Sachs Group, Inc." qlobal maliyyə sektorunun ən nüfuzlu institutlarından biridir. Onun əsası 1869-cu ildə Almaniyadan ABŞ-a köçmüş Markus Qoldman tərəfindən qoyulub.

Valyuta.az xəbər verir ki, o, Nyu-Yorkda kiçik bir ofisdə fəaliyyətə başlayaraq, ticarət sənədləri alqı-satqısı ilə məşğul olub.

Bu sənədlər müəssisələrin bir-birinə verdiyi qısa müddətli ödəniş öhdəlikləri idi və Markus Qoldman həmin sənədləri alaraq banklara satmaqla aradakı fərqdən gəlir əldə edirdi. Bu, bank kreditlərinə çıxışı məhdud olan bizneslər üçün alternativ maliyyə aləti kimi qəbul edilirdi.

1882-ci ildə Markus Qoldman şirkətinə kürəkəni Samuel Saksı cəlb etdi. Samuel Saks onun ailə dostu Cozeff Saksın oğlu idi və Markus Qoldmanın qızı Luiza Qoldman ilə evlənmişdi. Bu ailə bağları və işgüzar tərəfdaşlıq nəticəsində şirkətin adı "Goldman Sachs & Co." olaraq formalaşdı. Sonrakı illərdə Markus Qoldmanın oğlu Henri Qoldman və digər ailə üzvləri də şirkətin inkişafında fəal iştirak etdilər.

XX əsrin əvvəllərində "Goldman Sachs" yalnız ticarət sənədləri ilə deyil, bir sıra maliyyə xidmətləri ilə də məşğul olmağa başladı. Şirkət sərmayə bankçılığı, birləşmə və satın alma əməliyyatları, birja emissiyaları və digər maliyyə alətləri ilə fəaliyyət sahəsini genişləndirdi. Bu proseslər "Goldman Sachs"ın "Wall Street"də nüfuzlu mövqe qazanmasına şərait yaratdı.

Şirkət sonrakı onilliklərdə də sürətli inkişafını davam etdirdi və hazırda 30-dan çox ölkədə nümayəndəliyə malikdir. Müasir dövrdə bank investisiya bankçılığı, aktivlərin idarə olunması, bazar əməliyyatları və rəqəmsal maliyyə xidmətləri sahələrində fəaliyyət göstərir.

2016-cı ildə şirkət "Marcus by Goldman Sachs" adlı rəqəmsal platformanı istifadəyə verdi. Bu platforma fərdi istifadəçilərə kredit və əmanət məhsulları təqdim edir. Beləliklə, "Goldman Sachs" ənənəvi institusional müştərilərdən kənara çıxaraq geniş auditoriyaya xidmət göstərməyə başladı.

"Goldman Sachs"ın tarixi bir immiqrantın kiçik biznes təşəbbüsündən başlayaraq, qlobal maliyyə sisteminin mühüm oyunçusuna çevrilməsini nümayiş etdirir. Bu inkişaf şirkətin adaptasiya qabiliyyətini və dəyişən maliyyə mühitinə uyğunlaşma bacarığını göstərir.

Mayya Hüseynova