Əhaliyə göstərilən bu xidmətlərdə də bahalaşma olub

2026-cı ilin yanvar ayında bahalaşma olan qeyri-qida malları da bəlli olub. 

Valyuta.az xəbər verir ki, əvvəlki ayla müqayisədə qeyri-qida məhsullarından daha çox bahalaşma parçaların, divar kağızının, plastik pəncərənin, laminat parketin, sementin, masa və oturacaq mebellərinin, xalçanın, istilik sistemi üçün istilik qurğusunda müşahidə olunub.

Eyni zamanda kiçik elektrik cihazlarının, “Aİ-92” markalı avtomobil benzininin, dizelin, mühərrik yağının, mobil telefonların, qəzetlərin, zərgərlik məmulatları da bahalaşan mallar arasında yer alıb.

Ucuzlaşma isə kəsilmiş taxtanın, soyuducuların, kondisionerlərin, planşet və kompüterlərin qiymətlərində müşahidə olunub.

Əhaliyə göstərilmiş ödənişli xidmətlərdən bahalaşma yanvar ayında elektrik enerjisi və təbii qaz təchizatı, tibbi və stomatoloji, taksi, bərbərxana, restoran və kafelər tərəfindən göstərilən iaşə xidmətlərində, ucuzlaşma isə malların çatdırılması və hava nəqliyyatı ilə beynəlxalq sərnişindaşıma xidmətlərinin qiymətlərində müşahidə olunub.

Sərvanə Rəmixanova