Əgər 2016-cı ildə Uorren Baffettin sərmayələrini izləsəydiniz, bu qədər varlanmış olardınız

Bəzi insanlar üçün Uorren Baffett kimi investorları təqlid etmək uğurlu strategiyaya çevrilib. “Berkshire Hathaway”in (BRK-B) səhmlərini almaq Baffettin hər bir addımını izləməkdən daha asandır, lakin onun əsas qərarlarına daha yaxından baxmaq uzunmüddətli maraqlı imkanlar aça bilər.

2016-cı ilin sonunda Baffettin ilk beş böyük investisiya hədəfi "Kraft Heinz" (KHC), "Wells Fargo" (WFC), "Coca-Cola" (KO), "IBM" (IBM) və "American Express" (AXP) idi. Bu beşlikdən dördü son beş il ərzində əhəmiyyətli artım göstərib. Lakin Baffettin 2016-cı il sərmayələrinin ən vacib məqamlarından biri onun "Apple" (AAPL) şirkətinə yatırımı oldu. O, "Apple" səhmlərini 2016-cı ilin ilk rübündə almağa başladı və tezliklə bu şirkəti özünün ən böyük sərmayə obyektinə çevirdi.

İnvestorlar 2016-cı ildə “Apple” və ya “Berkshire Hathaway” səhmləri alsaydılar, nə qədər gəlir əldə edə bilərdilər?

Eyni zamanda, Baffettin mütəmadi olaraq tövsiyə etdiyi əsas birja indeks fondlarının da bu dövrdə necə artdığına nəzər salmaq faydalı olar.

“Berkshire Hathaway” səhmləri artmaqda davam etdi

2016-cı il yanvarın 29-da “Berkshire Hathaway” səhmləri 129,77 dollardan bağlanmışdı. Demək olar ki, 10 il sonra, 2026-cı il yanvarın 30-da səhmin qiyməti 480,53 dollara çatıb. Bu, 270%-lik artım deməkdir. Əgər o zaman 10.000 dollar yatırılmış olsaydı, bu gün həmin vəsait 37.000 dollara çevrilmiş olardı.

Səhmlər son bir il ərzində cüzi artım göstərsə də, son beş ildə iki dəfədən çox bahalaşıb. “Berkshire Hathaway” iqtisadiyyatın göstəricisi hesab olunur, çünki bu şirkət sığorta, kommunal xidmətlər, istehsalat və pərakəndə satış sahələrində çoxsaylı bizneslərə sahibdir. Şirkət səhmdarlarına dividendlər ödəmir və trilyon dollarlıq bazar dəyərinə malik nadir korporasiyalardan biridir.

“Apple” ən çox qazandıran investisiya oldu

“Apple”, Baffett üçün olduqca gəlirli sərmayəyə çevrildi. Şirkətin səhmləri 2016-cı il yanvarın 29-da düzəldilmiş qiymətlə 21,95 dollara bağlanıb. 2026-cı il yanvarın 30-da isə bu göstərici 259,48 dollara yüksəlib. Bu isə 1082%-lik artım deməkdir. Əgər 10.000 dollar sərmayə qoyulsaydı, indi 118.200 dollar olardı.

“Apple”ın "iPhone" bazarındakı üstünlüyü və yüksək marjalı xidmət gəlirləri uzunmüddətli yüksəlişin əsas səbəblərindəndir. Şirkət həmçinin Çində məhsullarına tələbatı yüksək səviyyədə saxlayıb və səhmdarlar üçün gəlirləri artırmaq məqsədilə daim səhmlərin geri alınmasını həyata keçirib. “Apple”ın süni intellekt sahəsinə keçidi isə "iPhone" satışlarının artımını daha da sürətləndirə bilər.

S&P 500 də güclü performans göstərdi

Baffett adətən fərdi səhmləri seçsə də, eyni zamanda S&P 500 indeks fondlarına sərmayə qoymağı tövsiyə edir. “SPDR S&P 500 ETF Trust” (SPY) 2016-cı il yanvarın 29-da 164,19 dollardan bağlanmışdı. 2026-cı il yanvarın 30-da isə bu rəqəm 691,97 dollara çatıb. Bu dövrdə 321%-lik artım müşahidə olunub. Başqa sözlə, 10.000 dollarlıq sərmayə 42.100 dollar qazandırardı.

Son on ildə bu investisiyaların istənilən biri ilə əldə olunan gəlir investorlar üçün olduqca sevindirici ola bilərdi. S&P 500-ün performansı göstərir ki, sərmayə yatırmaq üçün mütləq peşəkar olmaq vacib deyil. İndeks fondları, müxtəlif şirkətləri ətraflı təhlil etmədən səhmlərə sərmayə qoymaq istəyənlər üçün əlverişli vasitədir.

Tənzilə Ağabalayeva