"Çirkin" adlandırılan "Crocs" necə trendə çevrildi? - SƏHƏR OXUSU

Bir zamanlar “ən pis ixtiralardan biri” kimi qiymətləndirilən "Crocs" bu gün milyardlarla dollar dövriyyəsi olan qlobal brendə çevrilib.

Valyuta.az xəbər verir ki, "Crocs"un hekayəsi 2000-ci illərin əvvəlində sadə bir ideya ilə başlayıb. Qurucular Karib dənizində səyahət zamanı suya davamlı və rahat ayaqqabı ideyasını kəşf edərək ilk modeli - “Beach” adlı ayaqqabını 2002-ci ildə təqdim ediblər. İlk 200 cüt isə qısa müddətdə satılıb.

Bu ayaqqabı xüsusi “Croslite” materialı sayəsində həm yüngül, həm rahat, həm də suya davamlı idi. Qısa müddətdə yalnız dənizçilər üçün nəzərdə tutulan məhsul gündəlik istifadə üçün populyarlaşdı.

2005-ci ildə "Crocs" artıq 6 milyon cüt satışa çatdı. Daha sonra isə ayaqqabıya əlavə edilən “Jibbitz” aksessuarları brendin fərdiləşmə trendini gücləndirdi və satışları daha da artırdı.

Lakin 2008-ci il maliyyə böhranı şirkət üçün çətin dövr oldu. Satışlar azaldı, işçilər ixtisar edildi və brend populyarlığını itirməyə başladı.

Dönüş nöqtəsi isə 2016-cı ildə London Moda Həftəsində baş verdi. Dizaynerlərlə əməkdaşlıq "Crocs"u yenidən trendə çevirdi. Daha sonra məşhurlarla və brendlərlə kollaborasiyalar bu prosesi daha da sürətləndirdi.

Pandemiya dövründə rahat ayaqqabılara tələbatın artması ilə "Crocs" yenidən zirvəyə qayıtdı və illik gəliri milyardlarla dollar səviyyəsinə yüksəldi.

Sərvanə Rəmixanova