Cəfər Babayev: "İstehlakçı hüquqlarında rəqəmsal sahə ilə bağlı şikayətlər artır"

2025-ci ilin təhliləri göstərir ki Azərbaycanda istehlakçı hüquqları ilə bağlı daxil olan müraciətlərin 30%-i təkcə məhz rəqəmsal münasibətlərlə bağlıdır.

Valyuta.az xəbər verir ki, bunu bu gün Ümumdünya İstehlakçı Hüquqlarının Müdafiəsi Günü ilə əlaqədar “Müasir Rəqəmsal Dünyada İstehlakçılar: elektron ticarət, rəqəmsal xidmətlər və təhlükəsizlik məsələləri” mövzusunda keçirilən tədbirdə Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi sədrinin birinci müavini Cəfər Babayev bildirib.

“Bu rəqəmlər təkcə bizim məlumatlarımıza əsaslanmır, eyni zamanda digər dövlət qurumlarının apardığı təhlillərdə də öz əksini tapır. Məsələn, son zamanlar Mərkəzi Bankın yaydığı məlumatlara görə, elektron ticarət platformalarında nağdsız ödənişlərin həcmi hər il artmaqdadır”.

C.Babayev vurğulayıb ki, bu sahədə istehlakçı hüquqlarının qorunması üçün Agentliyin qanunvericiliklə müəyyən edilmiş səlahiyyətləri və mexanizmləri mövcuddur:

"Bununla yanaşı, biz yalnız hüquqi mexanizmlərlə kifayətlənmirik. Maarifləndirmə və əməkdaşlıq kimi “yumşaq güc” vasitələrindən də istifadə etməyə çalışırıq. Elektron və rəqəmsal sahədə yaranan mübahisələr göstərir ki, artıq ənənəvi istehlakçı-sahibkar münasibətlərindən fərqli yanaşmalar tələb olunur".

Tənzilə Ağabalayeva