“Bunu almayın!” - Satmadan təsir yaradan bir brendin hekayəsi - SƏHƏR OXUSU

Dünyada bəzən elə insanlar və şirkətlər olur ki, səssizcə böyük dəyişikliklərə səbəb olur. Onlar nə bağırırlar, nə də reklamlarla göz deşirlər. Onlar sadəcə dəyərləri ilə danışırlar.

Valyuta.az xəbər verir ki, "Patagonia" - belə şirkətlərdən biridir. Onun yaradıcısı, dağçı və sənətkar Yvon Şinod (Yvon Chouinard) isə təkcə sahibkar yox, eyni zamanda fəlsəfi baxış sahibi olan insandır.

İdeyanın doğulduğu yer

Yvon Şinod gəncliyində dağlara vurulmuşdu. Amma bu sevgisi onu təkcə zirvələrə yox, özünə sual verməyə də apardı: “İstifadə etdiyim avadanlıq təbiətə nə qədər ziyan vurur?”

Bu sual onun həyat yolunu dəyişdi. O, uzunömürlü, təkrar istifadə oluna bilən, təbiətə hörmətlə yanaşan məhsullar hazırlamağa başladı. Beləcə, 1973-cü ildə "Patagonia* doğuldu.

Amma bu, tipik bir brend deyildi.

“Bunu almayın” mesajı

2011-ci ildə Black Friday günü Patagonia tam səhifəlik reklam verdi. Başlıq sadəcə bu idi: “Don't Buy This Jacket”

Əgər bu sizə qəribə gəlirsə, məqsəd elə bu idi - istehlakı təbliğ etmək deyil, sorğulamaq.

Bu reklamla şirkət insanlara dedi: “Əgər ehtiyacınız yoxdursa, məhsul almayın. Planeti yalnız davamlı istehlakla qoruya bilərik”.

İş yerində dəyərlər

Patagonia sadəcə məhsul satmır, mədəniyyət qurur. Şirkətdə işçilər dalğa varsa, sörfə getmək üçün icazə alır. Ofisdə uşaq baxçası var - ailə ilə iş arasında seçim etməyə ehtiyac yoxdur.

Hər geyimin etiketində onun harada və kim tərəfindən tikildiyi yazılır.

Pul yoxsa planet

2022-ci ildə Yvon Şinod ailəsi ilə birlikdə "Patagonia"nın mülkiyyətini bir fondda yerləşdirdi. Şirkət artıq ailəyə yox, Yer kürəsinə “məxsusdur”. Bütün gəlirlər ekoloji layihələrə yönəldilir.

Şinod belə dedi: “Planet bizim yeganə səhmdarımızdır”.

Bu addım biznes dünyasında fəlsəfi çevriliş kimi qarşılandı. Çünki bu, kapitalizmin içində vicdanla yaşamağın mümkün olduğunu sübut etdi.

Səssiz marketinq

Patagonia-nın hekayəsi sadəcə bir brendin deyil, yeni düşüncə tərzinin simvoludur.

Burada əsas ideya budur: Daha çox satmaq yox, daha az israf etmək.

Reklam bağırmaq deyil, düşünməyə çağırmaqdır.

Buna marketinqdə “etik brendinq” deyirlər. Bu model getdikcə daha çox insanın inandığı yoldur - çünki istehlakçı da vicdan axtarır.