Bu yay turist görmək istəməyən 8 ölkənin adı açıqlandı

Son illərdə turistlərin eyni istiqamətləri seçməsi bəzi məşhur ölkələrdə narazılıq yaradıb. Bir sıra dövlətlər artıq açıq şəkildə turist axınını məhdudlaşdırmağa çalışır. Məsələn, Tailand hakimiyyəti turistlər üçün vizasız qalma müddətini 60 gündən 30 günə endirmək qərarı verib.

Qaynarinfo “Travel Off Path”a istinadən xəbər verir ki, yalnız Tailand deyil, dünyanın müxtəlif məşhur turizm istiqamətləri də yüksək rüsumlar, sərt giriş qaydaları və əlavə nəzarət vasitəsilə əsasən varlı turistləri cəlb etməyə çalışırlar.

Nəşrin müəllifləri hesab edir ki, bu strategiya əks nəticə verir:

“Orta təbəqəni təşkil edən turistlər yerli restoranları və mövsümdənkənar iqtisadiyyatı ayaqda saxlayır. Onlara qapıları bağlamaq ciddi maliyyə nəticələrinə səbəb olur”.

Ekspertlər turistlərə bu yay ehtiyatla yanaşmalı olduqları 8 ölkəni və alternativ istiqamətləri təqdim ediblər.

1. Tailand

Tailand yalnız vizasız qalma müddətini azaltmayıb, həm də ölkəyə giriş üçün 300 bat (təxminən 7 dollar) rüsum tətbiq etməyə hazırlaşır. Hakimiyyət daha çox lüks turizmi inkişaf etdirmək istəyir. Lakin artıq 2026-cı ilin əvvəlində ölkəyə gələn xarici turistlərin sayı 7%-dən çox azalıb.

Alternativ: Malayziya

Malayziya əksər Qərb ölkələri üçün 90 günlük sadə vizasız rejimi saxlayır və turistləri fəal şəkildə cəlb etməyə çalışır.

2. İspaniya

İspaniya turistlərdən geniş şəxsi məlumatlar, o cümlədən bank kartı məlumatları və ailə əlaqələri barədə informasiya tələb edir. Bundan əlavə, ölkədə anti-turizm aksiyaları geniş yayılıb.

Alternativ: Monteneqro

Burada da Aralıq dənizi sahilləri və zəngin tarix var, lakin turistlərə münasibət daha müsbətdir.

3. İtaliya

İtaliyada turistlər üçün yeni ödənişlər və qadağalar tətbiq olunur. Venesiyada şəhərə giriş ödənişlidir, Romada isə Trevi fəvvarəsinə yaxınlaşmaq üçün ayrıca haqq tələb olunur. Bir çox şəhərlərdə küçədə yemək yemək və ya tarixi pilləkənlərdə oturmaq cərimə ilə nəticələnə bilər.

Alternativ: Xorvatiya

Adriatik sahilləri və qədim şəhərləri ilə Xorvatiya daha rahat turizm mühiti təklif edir.

4. ABŞ

Donald Tramp administrasiyası dövründə sərhəd yoxlamaları sərtləşdirilib. Bəzi ölkələrin turistləri üçün 15 min dollarlıq depozit tələbi və milli parklarda qiymət artımları tətbiq olunub.

Alternativ: Panama

Müasir infrastruktur və turistlər üçün əlverişli biznes mühiti ilə seçilir.

5. Niderland

Amsterdam son illərdə turistləri şəhərdən uzaq durmağa çağıran reklam kampaniyaları aparıb. Şəhərdə turist vergisi yaşayış qiymətinin 21%-nə qədər yüksələ bilər.

Alternativ: Danimarka

Kopenhagen turistləri velosiped sürmək kimi “müsbət davranışlara” görə pulsuz yemək və muzey biletləri ilə mükafatlandırır.

6. Yaponiya

Yaponiya həddindən artıq turist axını səbəbindən yeni məhdudiyyətlər tətbiq edir. Fuji dağı kimi məşhur məkanlara giriş məhdudlaşdırılıb və turist vergiləri artırılıb.

Alternativ: Cənubi Koreya

Müasir şəhərlər və qədim məbədləri daha əlçatan şərtlərlə təqdim edir.

7. İslandiya

2026-cı ildən İslandiyada yollar üçün yeni ödəniş sistemi tətbiq olunub. İcarəyə götürülmüş avtomobillər turistlərin qət etdiyi məsafəni izləyir və səyahətin sonunda böyük hesab təqdim edilir.

Alternativ: Norveç

Norveç də möhtəşəm fyordlar və təbiət təqdim edir, lakin ictimai giriş hüquqlarına daha açıq yanaşır.

8. Kanada

Kanada bir sıra ölkələr üçün viza qaydalarını sərtləşdirib. Meksika vətəndaşları üçün turist vizaları yenidən tətbiq olunub və çoxsaylı müraciətlər texniki səbəblərlə rədd edilir.

Alternativ: Argentina

Pataqoniya bölgəsi möhtəşəm təbiət, buzlaqlar və dağ mənzərələri təqdim edir, üstəlik viza prosedurları daha sadədir.

Paşa Məmmədli