Bu universitet milyonluq tenderlər elan etməyə davam edir

Bakı Dövlət Universiteti (BDU) daha bir irihəcmli satınalma müqaviləsi elan edib.

Valyuta.az xəbər verir ki, universitetin Qazanxana binasının və “Yüksək Texnologiyalar Mərkəzi”nin inzibati binası üzrə dayandırılmış tikinti işlərinin davam etdirilməsi məqsədilə satınalma tenderi elan olunub.

Tender çərçivəsində işlərin ümumi dəyəri 10 milyon 150 min 903 manat olaraq müəyyən edilib. Müsabiqə üzrə təkliflərin son təqdim olunma tarixi 3 fevraldır.

Qeyd edək ki, yanvar ayının əvvəlində Bakı Dövlət Universiteti daha bir iri tenderin nəticəsini açıqlayıb. Belə ki, Yasamal rayonu, Akademik Zahid Xəlilov küçəsi, 33 ünvanında yerləşən 10 mərtəbəli, zirzəmili 1 nömrəli tədris binasının əsaslı təmiri ilə bağlı keçirilən tenderin qalibi Koneks Construction MMC olub.

Həmin tender üzrə müqavilə dəyəri 23 milyon 489,9 min manat, ehtimal olunan qiymət isə 25 milyon 69,9 min manat təşkil edib.

Bundan əlavə, Bakı Dövlət Universiteti daha əvvəl laboratoriya avadanlıqlarının alınması və mühafizə xidmətləri üzrə ümumi dəyəri 4 milyon 103 min 559 manat olan müqavilələr də imzalayıbı. Sözügedən 2 satınalma üzrə qalib şirkətlər Gesco ASC və Linkline MMC olub.

Sərvanə Rəmixanova