BP-nin distribyutoru nizamnamə kapitalını 8 milyon manatdan çox azaldıb

“Petrokem Qrup” MMC, nizamnamə kapitalının 13 milyon 90 min manat məbləğindən 8 milyon 508 min 500 manat azaldılaraq, 4 milyon 581 min 500 manata endirildiyini elan edib. 

Valyuta.az xəbər verir ki, bu, kapitalda 2,9 dəfə azalma deməkdir.

Şirkət bu dəyişikliklə bağlı debitor və kreditorlara rəsmi xəbərdarlıq yayıb. Bildirilib ki, Azərbaycan Respublikasının qanunvericiliyinə əsasən, kreditorlar hüquqi şəxsin nizamnamə kapitalının azaldılması halında öhdəliklərin vaxtından əvvəl icrasını, xitam verilməsini və ya zərərin əvəzinin ödənilməsini tələb etmək hüququna malikdirlər.

MMC, 1992-ci ildən BP şirkətinin Azərbaycandakı sürtkü yağları üzrə eksklüziv distribyutoru olan “Petrochem Group”un tərkibində fəaliyyət göstərir. Şirkət həmçinin “Azəri-Çıraq-Günəşli” (AÇG), “Şahdəniz”, “Bakı-Tbilisi-Ceyhan” (BTC) və “Cənubi Qafqaz” boru kəməri (CQBK) layihələri üzrə inventar idarəçiliyi, tələblərin planlaşdırılması və mütəxəssis məsləhətləri kimi xidmətlər göstərir.

2004-cü ilin noyabrında dövlət qeydiyyatına alınan MMC-nin qanuni təmsilçisi Əliyev Fərhaddır.

Mayya Hüseynova