Boşanmaların bizneslərə vurduğu zərərlər – Milyardlar itirilir

Boşanma sevdiyimiz insanın ölümündən sonra yaşaya biləcəyimiz 2-ci ən stressli həyat hadisəsi hesab olunur. Boşanma itkidir, boşanan insan itki yaşayır və kədərin 5 mərhələsindən keçir. Ona bu itkini yaşamağa və qəbullanmağa zaman lazımdır. Bu zaman işəgötürənin də üzərinə müəyyən məsuliyyət düşür.

Kama Ahmad, kouç

Boşanmanın iş həyatına və bizneslərə təsirlərini başa düşmək rəhbərlərə və insan resursları mütəxəssislərinə boşanma ilə üzləşən heyətə daha yaxşı dəstək olmağa kömək edər.

Boşanma biznesə necə təsir edir?

Minneapolisdə yerləşən “Life Innovations”ın araşdırmasına görə, münasibətlərlə bağlı problemlərdən yaranan stress şirkətlərə ildə 300 milyard dollara başa gəlir. Eyni araşdırma, yeni boşanmış bir işçinin bir ildə dörd həftədən çox iş buraxa biləcəyini göstərib. 

“Harvard Business Review” boşanmanın müəssisələrə və iş yerinə təsirinin müxtəlif yollarını araşdırıb və boşanmaların bizneslərə illik olaraq 150 milyard dollara başa gəldiyini aşkar edib.
Boşanma işçi məhsuldarlığına bir çox yolla təsir edir ki, bu da həm işçi, həm də işəgötürən üçün gəlir itkiləri ilə nəticələnir. Boşanan insanlar boşanmadan sonra 5 il ərzində işdə daha aşağı məhsuldarlıq səviyyəsi göstərirlər. Yeni Minnesota Universitetinin bir araşdırmasına görə, ayrılıqdan keçən və boşanan insanların təxminən 44 faizi boşanma prosesində olmanın onların işinə mənfi təsir göstərdiyi ilə razılaşıblar. Bəziləri işdə daha çox diqqətinin dağıldığını və ya hətta ağlamaq üçün ara vermək lazım olduğunu hiss etdiklərini bildirib.

Böyük Britaniyada 130 iş yerində işçilər arasında aparılan araşdırmaya görə, respondentlərin 60%-i ayrıldıqdan sonra psixi sağlamlıq problemlərindən əziyyət çəkdiyini qeyd edib. 10%-i boşanmanın ilk ilində işini tərk etdiyini bildirib.

“Nashville Business Journal”ın 2014-cü ildə apardığı başqa bir araşdırması göstərib ki, boşanmadan əvvəlki altı ayda və boşanmanın ilk ilində insanların məhsuldarlığı 40% azalır.

Boşanma Sizin iş həyatınıza necə təsir edir?

- Diqqətin yayınması və konsentrasiyanın azalması
- İşdə səhvlərin və iş qəzalarının artması
- İşdə zəif qərarlar qəbul etmək
- Aşağı sağlamlıq səviyyəsi, işdən yayınma hallarının artması
- Boşanan işçilər çox vaxt işə gecikirlər
- Unutqanlıq, yaddaş problemləri
- Narahatlıq, qəzəb, tənhalıq və yorğunluq işdə insanın mühakimələrini bulandırır və məhsuldarlığın aşağı düşməsinə səbəb olur.
- İşdə daha neqativ əhval-ruhiyyə və aşağı iş performansı
- Boşanma zamanı və sonrasında bir çox insan mental problemlər yaşayır və işini tərk edir.
Boşanmadan keçən insan stress, narahatlıq, gələcəklə bağlı qorxular yaşayır. Araşdırmalar deyir ki, boşanmadan keçən insanların 30%-i depressiya yaşayır. Tək valideyn olmaq, şəxsi həyatda artmış məsuliyyət və öhdəliklər onun işinə və işdəki performans səviyyəsinə də təsir edir.

Boşanma yüksək münaqişəlidirsə, bu prosesi daha da çətinləşdirir. İnsan eyni anda həm işini, həm də şəxsi həyatındakı münaqişəni idarə etməyə çalışır və təbii ki, şəxsi həyatdakı stress iş həyatına da yansıyır. Boşanmadan daha rahat keçmək, boşanmadan sonra bərpa prosesini sürətləndirmək və boşanmanın iş həyatına təsirini maksimum azaltmaq üçün boşanan insanlar emosional və psixoloji dəstək xidmətlərinə müraciət etməlidirlər.

Boşanma prosesində işəgötürənlər boşanmadan keçən işçilərinin tənha hiss etməmələri üçün onlara xüsusi dəstək göstərsələr və onlar dəstək gördüklərini hiss etsələr, bu onlara prosesdən daha rahat keçməyə və daha tez bərpa olmağa kömək edər. Bunun üçün boşanan işçiyə əsnək iş qrafikinin yaradılması, onun ehtiyac duyduğu resurslarla işəgötürən tərəfindən təmin olunması işçiyə bu çətin həyati mərhələni daha tez geridə qoymaqda kömək edə bilər.

İşçilərinin ən çətin anlarında yanında olan və onlara dəstək olan bir şirkət daha sadiq və yüksək motivasiyalı işçilər yetişdirər.