Azərbaycandan Ermənistana aparılan neft üçün simvolik tarif tətbiq edildi

Gürcüstan hökuməti Azərbaycandan Ermənistana neft məhsullarının tranziti üçün simvolik tarif tətbiq edib. Valyuta.Az-ın verdiyi məlumata görə, bu addım rəsmi Tbilisi ilə Yerevan arasında keçirilən danışıqlarda əsas müzakirə mövzusu olub və Ermənistan rəsmiləri qərara görə Gürcüstan tərəfinə təşəkkürünü bildirib.

Gürcüstan İqtisadiyyat və Davamlı İnkişaf Nazirliyi tərəfindən verilən açıqlamada bildirilir ki, neft məhsullarının Gürcüstan ərazisindən Ermənistana daşınması üzrə tariflərin müzakirəsi 21 fevral 2026-cı il tarixində İrəvanda keçirilən görüş zamanı əsas məsələ olub. Görüşdə Gürcüstanın iqtisadiyyat naziri Mariam Kvrivişvili ilə Ermənistanın ərazi idarəetmə və infrastruktur naziri David Xudatyan bir araya gəliblər.

Tarif detalları açıqlanmasa da, bu rüsumun simvolik səviyyədə müəyyən edildiyi bildirilir. Mənbələr qeyd edir ki, 2025-ci ilin dekabrında Gürcüstan Azərbaycandan Ermənistana ilk neft tranzitini tamamilə pulsuz həyata keçirmişdi. Sonrakı yüklər isə ənənəvi tariflə həyata keçirilmişdi ki, bu da Ermənistan tərəfindən narazılıqla qarşılanmışdı.

Ermənistan rəsmiləri bu addımı regional əməkdaşlıq çərçivəsində müsbət addım kimi qiymətləndiriblər və Tbilisiyə təşəkkürünü ifadə ediblər. Tarifin məbləği ilə bağlı hələlik rəsmi açıqlama yoxdur.