Bakıda ən ucuz və ən baha kirayə evlər - QİYMƏTLƏR

“Bakı şəhərinin 12 rayonu üzrə təqdim olunan rəqəmlər orta statistik göstəricilərdir. Bu isə o demək deyil ki, həmin qiymətlər bütün ərazilər üçün eynidir və ya ondan yuxarı və aşağı təkliflər yoxdur”.

Valyuta.az "Baku.ws"ə istinadən xəbər verir ki, bu sözləri Azərbaycan Qiymətləndiricilər Cəmiyyətinin (AQC) sədri Vüqar Oruc bildirib.

AQC sədri əlavə edib ki, rəqəmlər rayonların əhali sıxlığı, iqtisadi potensialı və daşınmaz əmlak bazarının mövcud vəziyyəti nəzərə alınaraq formalaşdırılıb:

“Göründüyü kimi, paytaxtın mərkəzi və daha prestijli hesab olunan rayonlarında kirayə qiymətləri daha yüksəkdir. Tələbin çox olması səbəbindən Səbail rayonu lider mövqedədir. Onu Nəsimi rayonu izləyir. Xətai və Nərimanov rayonları da yüksək göstəricilərlə növbəti sıralarda qərarlaşıb. Daha sonra Nizami və Yasamal rayonları gəlir.

Ən aşağı kirayə qiymətləri isə Qaradağ və Pirallahı rayonlarında qeydə alınır. Bu, həmin ərazilərdə əhali sıxlığının az olması, iqtisadi və sosial infrastrukturun tam formalaşmaması, eləcə də kirayə mənzillərə tələbin digər rayonlarla müqayisədə aşağı olması ilə bağlıdır.

Bununla yanaşı, bəzi “orta seqment” rayonlarda yaxın illərdə ciddi infrastruktur dəyişiklikləri planlaşdırılır. Yeni metro stansiyalarının açılması, tramvay xətlərinin çəkilməsi, köhnə tikililərin sökülərək ərazilərin yenidən qurulması və parkların salınması kimi layihələr Bakı şəhərinin 2040-cı il inkişaf planına uyğun həyata keçiriləcək. Bu dəyişikliklər həmin rayonları daha cəlbedici edəcək və nəticədə kirayə bazarında da qiymət artımına təsir göstərə bilər”.