Azərbaycan və Avropanın İT sektorundakı iş mühiti arasındakı fərq

Miri Yusifli, Almaniya

İlk növbədə hər bir şirkətin iş mühiti özünə xasdır. Hər bir şirkətdə mühit fərqli ola bilər. Ancaq, ümumi yanaşsaq, görünən odur ki, İT sahəsində işə yanaşma Azərbaycan və Avropa arasında tamamilə fərqlidir.

Fərqlərdən ən əsası odur ki, şirkətlər işçini sadəcə yaxşı maaşla deyil, həmçinin işləmək, inkişaf etmək üçün əlverişli şərait yaradaraq çəkməyə çalışır. Buna görə də işçinin yaradılan şəraitdən istifadə edib inkişaf etməyi, şirkəti inkişaf etdirməyi işə götürən üçün çox önəmlidir. Bunu bilmək üçün müsahibə zamanı texniki biliklərlə yanaşı, xarakterə, düşüncə tərzinə, ünsiyyət bacarığına ciddi önəm verilir. 

Digər məsələ isə odur ki, Avropada insan ünsiyyətlərində vəzifələr çox da böyük rol oynamır. Sadə bir developer şirkətdə CTO ilə eyni komandanın tərkib hissəsi kimi danışa bilir. Bunun da əsas səbəbi odur ki, İT şirkətlərində komandalar şirkətin əsas özəyini təşkil etdiyi üçün rəhbərliyin əsas öhdəliklərindən biri də komandanın ehtiyaclarını təmin etmək, motivasiyasını yüksək tutmaqdır. Bunun qarşılığında işçilərdən olan gözlənti isə məhsulun tam məsulliyətini öz üzərinə götürmək, lazım gəldikdə məhsul haqqında qərar vərmək və onu inkişaf etdirmək üçün çalışmaqdır. 

Digər bir fərqli məsələ isə "work-life" balansıdır. Bu yəqin ki dünyanın heç bir yerində Avropada olduğu qədər yüksək deyil. Birinci iş, sonra həyat yerinə, Avropada birinci həyat sonra iş gəlir. İş vaxtı, şəxsi bir işiniz olduğu zaman o işin arxasınca getmək, işi 2 ci plana atmaq çox normal qarşılanır, ancaq təbii ki sonda işin vaxtında çatdırılması da çox önəmlidir.