Avropada enerji və yanacaq çatışmazlığı riski artır

Avropa aprel ayına qədər yanacaq qıtlığı ilə üzləşə bilər.

Valyuta.az xəbər verir ki, "Shell" şirkətinin baş icraçı direktoru Wael Sawan bildirib ki, Hörmüz boğazı yenidən neft və qaz daşımaları üçün açılmasa, Avropa artıq gələn ay yanacaq qıtlığı ilə üzləşə bilər.

Şirkət rəhbəri qeyd edib ki, hazırda hökumətlərlə birlikdə neft və qaz tədarükü böhranının həlli istiqamətində iş aparılır. Bu böhran artıq Asiya ölkələrində enerji məhdudiyyətlərinə səbəb olub.

Fars körfəzindən qlobal bazarlara neft daşımalarının əsas marşrutu olan Hörmüz boğazı açılmasa, Avropada bir neçə həftə ərzində fosil yanacaq qıtlığı yarana bilər.

Wael Sawan bildirib ki, böhranın ilk təsiri Cənubi Asiyada hiss olunub, daha sonra Cənub-Şərqi Asiya və Şimal-Şərqi Asiyaya yayılıb və aprel ayına doğru Avropaya çatacağı gözlənilir.

Onun sözlərinə görə, böhran artıq aviasiya yanacağı bazarına təsir edib və qiymətlər münaqişənin əvvəlindən iki dəfə artıb. Növbəti mərhələdə dizel yanacağı, daha sonra isə ABŞ və Avropada yay mövsümündə benzin bazarında təzyiqin artacağı gözlənilir.

Eyni tədbirdə çıxış edən Almaniyanın iqtisadiyyat naziri Katherina Reiche də xəbərdarlıq edib ki, münaqişə davam edərsə, enerji çatışmazlığı aprelin sonu və ya may ayında daha da kəskinləşə bilər.

Digər tərəfdən, "BlackRock" şirkətinin rəhbəri Larry Fink bildirib ki, neftin qiyməti 150 dollara yüksələrsə, bu, qlobal iqtisadiyyatda ciddi tənəzzülə səbəb ola bilər.

Onun sözlərinə görə, iki ssenari mümkündür: ya münaqişə həll olunacaq və neft qiymətləri əvvəlki 70 dollar səviyyəsinə qayıdacaq, ya da qiymətlər rekord həddə yüksələrək uzun müddət 100-150 dollar aralığında qalacaq və bu da iqtisadiyyata ciddi təsir göstərəcək.

Böyük Britaniya hökuməti isə ölkənin enerji təchizatının dayanıqlı olduğunu və vəziyyətin diqqətlə izlənildiyini açıqlayıb.