AFB Bank gəlir və mənfəət hədəflərini açıqlayıb

"AFB Bank 2025-ci ili yeni transformasiya mərhələsinin başlanğıcı kimi müəyyənləşdirib və bu çərçivədə bütün əsas xərcləri məhz ilkin illərə yönəltməyə çalışıb. Məqsəd, sonrakı illərdə bankın fəaliyyətini daha səmərəli və effektiv şəkildə qurmaq, qoyulan gəlirlilik və mənfəətlilik hədəflərinə çatmaqdır".

Valyuta.az xəbər verir ki, bu barədə bankın İdarə Heyəti sədrinin müavini Lalə Quliyeva bu gün keçirilən mətbuat konfransında məlumat verib.

Onun sözlərinə görə, bank 2026-cı ildə 9 milyon manat, 2027-ci ildə 13 milyon manat, 2028-ci ildə 17–18 milyon manat, 2029-cu ildə isə 22 milyon manat həcmində xalis mənfəət əldə etməyi hədəfləyir.

Əməliyyat mənfəəti üzrə proqnozlara əsasən, 2026-cı ildə bu rəqəm 11 milyon manat, 2027-ci ildə 16 milyon manat, 2028-ci ildə 22 milyon manat, 2029-cu ildə isə 27 milyon manat səviyyəsində nəzərdə tutulub.

Lalə Quliyeva qeyd edib ki, bu göstəricilərə çatmaq üçün bank daxilində struktur dəyişiklikləri aparılıb. Komandanın gücləndirilməsi, mövcud ştatın maarifləndirilməsi, rəqəmsal transformasiya proseslərinin genişləndirilməsi, risk menecmenti ofislərinin inkişafı və satış komandası üçün yeni kadrların cəlb edilməsi istiqamətində addımlar atılıb.

Onun sözlərinə görə, bu dəyişikliklər inzibati xərclərin artmasına səbəb olsa da, qoyulan investisiyaların gəlirliliyini növbəti illərdə müşahidə etmək mümkün olacaq.