ABŞ Ədliyyə Nazirliyi FED sədri Cerom Pauellə bağlı cinayət istintaqına başlayıb

ABŞ Ədliyyə Nazirliyi (Department of Justice) Federal Ehtiyat Sisteminin (Federal Reserve) sədri Cerom Powell barəsində cinayət istintaqına start verib.

Valyuta.az xəbər verir ki, Pauell bazar günü yaydığı videomüraciətdə bu addımı “misli görünməmiş presedent” adlandıraraq, prosesin administrasiya tərəfindən ona qarşı artan təzyiqlərin bir hissəsi olduğunu bildirib.

Məlumata görə, ABŞ Ədliyyə Nazirliyi Federal Ehtiyat Sisteminin Vaşinqtondakı baş qərargahının təmirinə dair Konqresə verdiyi ifadə ilə bağlı Pauellə bağlı böyük münsiflər heyəti (grand jury) vasitəsilə çağırış sənədləri təqdim edib. Sözügedən istintaq ötən il Senatın Bankçılıq Komitəsində verdiyi ifadələrə əsaslanır.

Pauell qeyd edib ki, istintaq FED-in faiz dərəcələrini siyasi istəklərə deyil, iqtisadi göstəricilərə əsasən müəyyən etməsinə görə aparılır:

“Cinayət təqibi hədəsiFED-in prezidentinin istəklərinə uyğun deyil, iqtisadi şərtlərə əsaslanan qərarlar verməsinin nəticəsidir”.

FED sədri bildirib ki, əsas məsələ mərkəzi bankın müstəqilliyinin qorunub-qorunmayacağıdır:

“Sual ondadır ki, FED faiz dərəcələrini sübutlara və iqtisadi reallıqlara əsasən müəyyən etməyə davam edəcək, yoxsa pul siyasəti siyasi təzyiq və qorxu ilə yönləndiriləcək.”

Trampla gərginlik fonunda istintaq

ABŞ Prezidenti Donald Tramp son dövrlər Pauelli faiz dərəcələrini kifayət qədər sürətlə endirməməkdə sərt şəkildə tənqid edir. Tramp həmçinin FED-in qərargahının 2,5 milyard dollarlıq təmir layihəsini də hədəfə alaraq, bu məsələ ilə bağlı Pauelli vəzifədən uzaqlaşdırmaqla hədələyib.

Pauell bildirib ki, qanunun aliliyinə hörmətlə yanaşır, lakin baş verənlər administrasiyanın davamlı təzyiqləri fonunda qiymətləndirilməlidir.

Pauell: “Vəzifəmi qorxu olmadan icra etmişəm”

FED sədri çıxışının sonunda vurğulayıb ki, vəzifəsini siyasi təsirlərdən kənar şəkildə icra edib: “Mən fəaliyyətimi heç bir siyasi qorxu və ya tərəfkeşlik olmadan, yalnız qiymət sabitliyi və maksimum məşğulluq mandatına fokuslanaraq həyata keçirmişəm. Dövlət qulluğu bəzən təhdidlər qarşısında möhkəm dayanmağı tələb edir. Senatın mənə həvalə etdiyi işi dürüstlüklə davam etdirəcəyəm”.

Tramp istintaqdan xəbəri olmadığını deyir

Donald Tramp NBC News-ə müsahibəsində istintaqla bağlı məlumatı olmadığını bildirib: “Bu barədə heç nə bilmirəm. Amma o, FED-də də yaxşı deyil, bina tikməkdə də”.

Sərvanə Rəmixanova