15 yaşında qurduğu startap 30 milyon dollara satıldı - SƏHƏR OXUSU

Nik D'Alizio (Nick D’Aloisio) Böyük Britaniyadan olan gənc proqramçıdır. Ən maraqlısı isə budur ki, o, startapını cəmi 15 yaşında qurub.

Valyuta.az xəbər verir ki, Nik xəbərləri oxuyanda onların çox uzun və vaxt aparan olduğunu düşünürdü.

Buna görə də belə bir sual verib: “Niyə xəbərləri daha qısa və anlaşıqlı formada oxumaq mümkün olmasın?” Bu fikir onu öz tətbiqini yaratmağa həvəsləndirib. O, “Summly” adlı proqram hazırladı. Bu tətbiq süni intellekt vasitəsilə uzun məqalələri qısaldır və əsas məlumatları istifadəçiyə təqdim edirdi.

Layihə qısa müddətdə populyarlaşdı və texnologiya sahəsində böyük maraq doğurdu. Ən maraqlı hissə isə 17 yaşında baş verdi. O, öz tətbiqini böyük texnologiya şirkəti olan “Yahoo!”ya təxminən 30 milyon dollara satdı. Beləliklə, Nik D'Alizio dünyanın ən gənc milyonçu startap qurucularından birinə çevrildi.

Bu hekayə onu göstərir ki, böyük uğur üçün mütləq böyük yaş və ya böyük imkanlar lazım deyil. Əsas olan problemi görmək, fərqli düşünmək və ideyanı həyata keçirməkdir. Nik sadə bir ehtiyacı gördü və onu gəlirli biznesə çevirməyi bacardı.

Mayya Hüseynova